Облыс әкімі Бейбіт ИСАБАЕВ жұмыс сапарымен Көксу ауданына барып, Мемлекет басшысының тапсырмасымен салынып жатқан тазы мен төбет орталығы мен Алматы – Өскемен тасжолындағы күрделі жөндеу және дала жұмыстарын көріп қайтты.
Мемлекет басшысының тапсырмасымен Айнабұлақта ТМД-да теңдесі жоқ тазы мен төбет орталығы салынуда. Қазақы, таза қанды иттердің тұқымын көбейту үшін мұнда тазы мен төбеттің селекциясы мен генетикасы зерттеледі. Демеушілер есебінен 100 итке салынған орталықтың жалпы аумағы 16 гектарды құрайды.
Мердігер «Жамбыл Элит Строй» ЖШС-нің директоры Рахмет Медеттің айтуынша, білікті мамандарға арналған жатақхана, ит жаттықтырып, дайындайтын алаң, асхана, ветеринариялық емхана сияқты 23 нысан салыныпты.
– Бүгінде мұнда 100 адам, 10 техника жұмыс істейді. Құрылыстың ішкі жұмыстары толық аяқталды. Қазір орталықтың айналасы абаттандырылуда, маусым айында толық аяқталады, – дейді ол.
Сапар барысында облыс әкімі:
– Тазы – қазақтың иті екені мемлекеттік деңгейде мойындалып, Заң қабылданды. Осыған орай Мемлекет басшысының тапсырмасымен облыста тазы мен төбет орталығы салынуда. Мұнда иттердің генетикасы, қаны тазаланады. Алдағы 5-7 жылда қазақы таза қанды иттер ежелгі қалпына келеді, – деді.
Көксу ауданындағы шаруа қожалықтары да қызу жұмысқа кірісті. Осыған орай облыс әкімі Бейбіт Исабаев Лабасы ауылдық округіндегі «Мырзахан» шаруа қожалығына барып, дала жұмыстарын көріп қайтты.
Шаруа қожалығы жұмысшылары егістік жерді тазалау, жер жырту, тұқым себу, суару жұмыстары рет-ретімен істеліп, қамбаны астыққа толтыру үшін мол өнім алуға бағыт ұстағанын айтады. 97 гектардың 85,5 гектарына «КВС Кашмир» сортты дәндік жүгері себілмек. Шаруа қожалық қызметкерлері «Global Agro» компаниясымен жұмыс істеуде. Атап айтсақ, былтыр гектарына 140 центнерден өнім алыпты. Бұл облыс бойынша ең жоғары көрсеткіштің бірі. Сонымен қатар, 10 гектар жерге күннің ыстығына төзімді қытайлық жүгері тұқымы себіледі. Егер өнім мол алынса келер жылы осы тұқымды себеміз дейді мамандар. Көктемнің әр күнін тиімді пайдаланғанда ғана күзде кеусені толатынын білетін облыс диқандары дала жұмыстарын бастап кетті.
– Биыл облыс бойынша дәндік жүгеріні 5 мың гектарға артық сепкелі отырмыз. Өйткені сұраныс көп. Дәндік дақылдың өнімін көбейту үшін түрлі агротехникалық техника қолданудамыз, – дейді облыстық ауыл шаруашылығы басқармасының басшысы Нұрдәулет Кененбаев.
Осыдан кейін облыс әкімі Алматы – Өскемен күрежолының 213-234 шақырым учаскесінде жүріп жатқан күрделі жөндеу жұмыстарын көрді. Оған 230 техника мен 300-ге жуық адам жұмылдырылған.
Бүгінде 7 шақырым учаскеде жол негізін қайта құру жұмыстары жота беткейлерін жайпақтау, су ағар кюветтерді бетондау жұмыстары жүргізілуде.
Осы ретте 1,5 шақырымда асфальт-бетон жабынының 2 қабаты жаңадан төселіп, жұмыстар жалғасуда. Жолдың қауіпсіздігі мен ұзақмерзімділігін қамтамасыз ету мақсатында қосымша нығайту жұмыстары жүргізілуде. Сонымен қатар, күрделі жөндеу жұмыстарына байланысты жол бойындағы жол-көлік оқиғаларының алдын алу және қозғалыс қауіпсіздігін сақтау мақсатында көлік қозғалысына уақытша өзгерістер енгізіледі. Атап айтқанда, Алматы – Талдықорған бағыты белгіленген қалыпты режимде сақталып, бүгіннен бастап Талдықорғаннан Алматыға бағытталған көлік қозғалысы Мұқыры елді мекені арқылы өтеді.
– Мұқыры арқылы өтетін жол қауіпсіздігіне қажетті белгілер толық орнатылған. Полиция қызметкерлері ұдайы бақылауда ұстайды. Күндіз-түні екі ауысыммен жұмыс істеп жүрміз. Күзде құрылыс жұмыстары аяқталады, – дейді Жетісу облыстық «ҚазАвтоЖол» филиалының директоры Нұрхат Ақылтаев.
Айдар Қалиев,
Көксу ауданы
