Жетісу облысы Қаратал ауданында қоғамға қайта бейімделудің жарқын үлгісі көрсетілді. Мұнда шартты түрде мерзімінен бұрын босатылған көпбалалы анаға үш бөлмелі үй берілді, – деп хабарлайды 7-su.kz ақпараттық порталы.
Түрмеден босап шыққан соң аяққа тұрып, қоғамнан өз орнын табу оңай емес. Әсіресе, артында алты баласы бар ана үшін бұл үлкен сынақ. Қаратал аудандық прокуратурасы бұл мәселеге бейжай қарамай, қайырымдылық қорларымен және жергілікті кәсіпкерлермен бірлесіп, отбасына көмек қолын созды. Нәтижесінде, көпбалалы анаға барлық жағдайы жасалған кең үй табысталды.
«Отбасының тұрақты баспанамен қамтамасыз етілуі балалардың құқығын қорғауға және ананың қоғамға қайта бейімделуіне негіз болды», – деп атап өтті прокуратура өкілдері. Бұл тек баспана беру ғана емес, сонымен қатар заңдылықты қамтамасыз ету мен қылмыстың алдын алудың тиімді тәсілі екені анық.
Тек үй беріп қана қоймай, отбасының тұрақты табыс көзін қалыптастыру үшін де нақты қадамдар жасалды. Прокуратураның ықпалымен әйелге 1,5 млн теңгеден астам қайтарымсыз мемлекеттік грант берілді. Бұл қаражатқа ол өзінің жеке дәнекерлеу шеберханасын ашты.
Бүгінде көпбалалы ана өз ісін дөңгелетіп, балаларын асырауға мүмкіндік алып отыр. Кәсіп ашу – оның қоғамға заңды түрде бейімделуіне және қайта қылмыс жасау қаупін сейілтуге берілген үлкен мүмкіндік. Жетісу өңірінде мұндай қолдау шаралары жүйелі түрде жүргізіліп келеді.
