Бүгінде Жетісу облысы аумағында толассыз жауған қармен қабаттаса соққан боран салдарынан тасжолдар жабылып, көліктер бөгелуде. Табиғаттың тарпаң мінезінен соңғы күндері Алакөл аумағында қар құрсауында қалған 23 адам құтқарылды.
Облыстық төтенше жағдайлар департаментінің мәліметінше, биылғы қыс басталғалы жалпы Жетісу өңірінде қар мен боранда қамалған 109 адам құтқарылған. Олардың 47-сі Сарыөзек–Көктал бағытындағы жол бойынан қар құрсауынан аман алып шығарылса, қалғандары Алакөл аумағындағы Үшарал–Достық бағытындағы жолдардан құтқарылған.
Аймақта соңғы кездердегі ауа райының құбылмалылығы өңірдегі көлік қозғалысына және жолаушыларға жиі кедергі келтіруде. Бұл жолы Үшарал–Достық бағытындағы Теректі учаскесі аумағындағы күре жолда көліктер қар құрсауында қалып, жүргізушілер құтқарушылар көмегіне жүгінген. Ауа райының қолайсыздығына қарамастан оқиға орнына жеткен құтқарушылар көліктерде болған 23 адамды аман алып шығып, қауіпсіз орындарға жеткізген.
Боранда қалған азаматтардың барлығы да дені аман, үсік шалып, зардап шеккендер жоқ. Олардың барлығы медициналық көмектің қажет еместігін айтқан.
Осыған байланысты облыстық төтенше жағдайлар департаменті азаматтарды қолайсыз ауа райы кезінде алдын ала жасалған ескертулерге құлақ асып, ұзақ жолға шықпауға шақырады.
Айдын КӘЛІМХАН
