Жетісу облысында 1999 жылы салынған Жайпақ станциясының теміржол вокзалы қайта жаңғыртудан кейін пайдалануға берілді. Жөндеу барысында ғимараттың ішкі бөлмелері мен инженерлік желілері жаңартылып, жолаушылар перроны абаттандырылды. Жоба еліміздегі 124 теміржол вокзалын жаңғырту бағдарламасы аясында жүзеге асырылды, – деп хабарлайды 7-su.kz ақпараттық порталы.
ҚТЖ-ның ресми мәліметіне сәйкес, жөндеу жұмыстары аяқталғаннан кейін бір қабатты ғимараттың ауданы 105,75 шаршы метрді құрады. Бұған дейін вокзалдың ауданы 96,6 шаршы метр болған.
Жаңғырту барысында вокзалдың ішкі бөлмелері, қабырғалары мен төбелері жаңартылып, сумен жабдықтау, кәріз және электр желілері ауыстырылды. Ғимараттың сыртқы келбеті де өзгерді. Қасбеті сәндік сылақпен әрленіп, іргетасының сыртқы бөлігі гранитпен қапталды. Еденге керамогранит төселді.
Жолаушылардың қауіпсіздігі мен қолайлылығын арттыруға да басымдық берілген. Вокзал аумағында қосымша эвакуациялық жолдар ұйымдастырылып, өрт қауіпсіздігі талаптарына сәйкес есіктер орнатылды. Сонымен қатар перрон мен оған іргелес аумақ абаттандырылып, бордюрлер қойылып, жаяу жүргіншілерге арналған жолдарға төсемтас төселді. Құрылыс кезінде отандық өндірістің материалдары пайдаланылды.
Жайпақ станциясының вокзалы III санатқа жатады. ҚТЖ мәліметінше, станция арқылы Ақтоғай мен Достық арасындағы қатынасты қамтамасыз ететін екі жолаушылар пойызы өтеді. Орташа тәуліктік жолаушылар ағыны шамамен алты адамды құрайды.
Вокзалды жаңғырту жобасы «Қазақстан темір жолы» ұлттық компаниясының өз қаражаты есебінен жүзеге асырылды. Жобаға Үкімет, Көлік министрлігі, «Самұрық-Қазына» қоры және Жетісу облысының әкімдігі қолдау көрсеткен.
Теміржол вокзалдарын жаңарту бағдарламасы жолаушылар инфрақұрылымын жақсартуға, қауіпсіздік талаптарын күшейтуге және қызмет көрсету сапасын арттыруға бағытталған. Жайпақ станциясындағы жұмыстар да осы мақсаттарды жүзеге асыруға мүмкіндік береді.
