Президент Қасым-Жомарт Тоқаев Жетісу облысының әкімі Бейбіт Исабаевты қабылдап, өңірдің әлеуметтік-экономикалық дамуы мен алдағы жоспарлар жайлы есеп тыңдады.
Әкімнің айтуынша, аймақта инфрақұрылымдық жобалар, агроөнеркәсіп кешенін дамыту, елді мекендерді газдандыру, әлеуметтік нысандар салу және жөндеу, туризмді өркендету бағытында ауқымды жұмыстар атқарылуда.
2022–2024 жылдары өңірде ұзындығы 498 шақырымды құрайтын «Талдықорған–Үшарал» және «Үшарал–Достық» автожолдары пайдалануға берілді. «Сарыөзек–Қорғас» бағытының 113 шақырымы жаңартылып, қалған 135 шақырымы биыл қарашаға дейін жөнделмек. Жоба құны – 41 млрд теңге. Осы жұмыстардың нәтижесінде облыстағы республикалық маңызы бар 1034 шақырым жол толықтай жақсы күйге келтіріледі.
Өткен жылы жергілікті маңызы бар жолдарға 41,4 млрд теңге бөлініп, 193 шақырым жол және 54 елді мекеннің ішкі көшелері жөнделді. Биыл бұл бағытқа 46 млрд теңге қарастырылып, 296 шақырым жол ретке келтірілуде.
Биыл Молалы айналмасынан Балқаш көліне дейінгі 132 шақырым жол жаңартылып, көліктер үшін ашылды. Жыл соңына дейін жол жиегі абаттандырылады. Сондай-ақ Лепсі ауылы – Балқаш көлі жағалауы арасындағы автожол қайта жаңғыртылуда. Жыл соңында Алматы – Өскемен – Лепсі – Ақтоғай автожолы да толық аяқталады.
Атқарылған жұмыстардың нәтижесінде облыстық маңызы бар жолдардың жақсы және қанағаттанарлық деңгейдегі үлесі 95 пайызға жетеді.
Ғалымжан Дәрібаев,
Жетісу облысының жолаушылар көлігі және автомобиль жолдары басқармасының басшысы
