Жетісу облысында шомылу маусымы кезінде тұрғындар мен туристердің қауіпсіздігін қамтамасыз ету бағытындағы жұмыстар күшейтілді. Бұл туралы Журналистер үйінде өткен брифингте облыстық төтенше жағдайлар департаментінің өкілдері мәлімдеді.
Облыс әкімдігінің қаулысына сәйкес, өңірде суға түсуге ресми түрде рұқсат етілген төрт орын бар. Олар – Талдықорған қалалық жағажайы, Алакөл ауданындағы Ақши және Көктұма, сондай-ақ Балқаш көлі жағалауы.
Шомылу маусымы басталғалы судағы қауіпсіздік талаптарының сақталуына бақылау күшейтілді. 1 маусымнан бері Төтенше жағдайлар департаментінің қызметкерлері Әкімшілік құқық бұзушылық туралы кодекстің 412-бабы бойынша судағы қауіпсіздік қағидаларын бұзған 8 азаматты әкімшілік жауапкершілікке тартқан.
Облыстық ТЖД төтенше жағдайларды жою басқармасының бастығы Елдар Тұрсыновтың айтуынша, биыл өңірде суға кету салдарынан төрт бала көз жұмған.
– Биыл облыста суға кету салдарынан төрт бала көз жұмды. Оның ішінде ең қайғылы жағдай Кербұлақ ауданындағы Аралтөбе су қоймасында тіркелді. Бұл жерде 2015 және 2017 жылы туған екі қыздың денесі табылды. Аралтөбе – ауыл шаруашылығы мақсатында пайдаланылатын су қоймасы, егістік алқаптарын суаруға арналған. Аталған аумақта суға түсуге тыйым салынғаны туралы арнайы белгілер орнатылған. Тағы бір оқиға Үштөбе қаласы маңындағы Қаратал өзенінде болды. Екі жастағы бала ата-анасының қарауынсыз өзен жағасында ойнап жүріп, суға құлап кеткен. Төртінші қайғылы жағдай Сарқан ауданындағы Мұқан Төлебаев ауылдық округіне қарасты Балқаш көлінің жабайы жағажайында тіркелді. Бұл аумақ суға шомылуға арналмаған. Үш жастағы бала ата-анасының қарауынсыз қалып, суға кеткен. Барлық жағдайда балалардың қараусыз қалу салдарынан болып отыр, – деді Елдар Тұрсынов.
Спикердің айтуынша, қайғылы оқиғалардың алдын алу үшін өңірде тұрақты түрде рейдтер ұйымдастырылып, тұрғындарға қауіпсіздік талаптары түсіндірілуде. Құтқарушылар жадынамалар таратып, әлеуметтік желілерде ақпараттық бейнероликтер жариялап келеді. Дегенмен мамандар өңірдегі барлық су айдындарын толық бақылауда ұстау мүмкін емес екенін атап өтті.
Брифинг барысында облыстық ТЖД азаматтық қорғаныс басқармасының бастығы Бағдат Тыныбеков 1 шілдеден бастап шағын көлемді кемелерге мемлекеттік бақылау жүргізу құзыреті Төтенше жағдайлар департаментіне берілетінін айтты. Оның сөзінше, бұл өзгеріс су айдындағы қауіпсіздікті күшейтіп, заң талаптарының сақталуын бақылауды тиімді етеді.
– 1 шілдеден бастап шағын көлемді кемелерге мемлекеттік бақылау жүргізу құзыреті Төтенше жағдайлар департаментіне беріледі. Осыған байланысты тиісті бақылау жұмыстарын жүргіземіз. Бүгінде облыс бойынша Алакөл мен Балқаш көлдерінде тіркелген 270 шағын көлемді кеме бар. Рейд барысында тіркелмеген жүзу құралдарының құжаттары тексеріледі. Сонымен қатар, гидроциклді тиісті жүргізу куәлігінсіз басқаруға болмайды. Ал шағын көлемді кемені мас күйінде басқарған азаматтар жеті жылға дейін көлікті басқару құқығынан айырылады, – деді Жетісу облыстық ТЖД азаматтық қорғаныс басқармасының бастығы Бағдат Тыныбеков.
Төтенше жағдайлар департаментінің өкілдері тұрғындарды тек арнайы жабдықталған жағажайларда ғана шомылуға, балаларды бір сәтке де қараусыз қалдырмауға, шағын көлемді жүзу құралдарын пайдаланғанда міндетті түрде құтқару кеудешесін киюге және қолайсыз ауа райында суға шықпауға шақырды.
Аяулым Шынгаева
