Мұнда ауданнан келген ұстаздар тәрбие жұмыстарының маңыздылығын көрсетті. Құқықбұзушылық, буллинг мәселелері талқыланды.
Шебер-класс бала тәрбиесіндегі бірнеше бағытты қамтыды. Қала мен әр ауданнан жиналған педагогтар топқа бөлініп, берілген тақырыпқа сай шебер-класс ұйымдастырды. Онда табысты оқушы қалыптастырудағы тәлімгердің қызметінің тиімділігі мен мектепте қолайлы білім беру ортасын құру мәселелері көтерілді.
“Мұнда құқықбұзушылықтың алдын алу, ата-ананың белсенділігін арттыру, оқушыға кәсіби бағдар беру, көшбасшылық қасиетін қалыптастыру, буллинг мәселелелерін педагогтар өзара талқыға салды. Шебер-класс алаңының негізі мақсаты да сол. Мұғалімдерді қазіргі қоғамда қайнап тұрған мәселелердің шешімін табуға тырысудағы амалы. Бұл оқушы үшін өте маңызды қағидалар саналады”, — дейді облыстық “Әдістемелік орталықтың” тәрбие бөлімінің басшысы Қайрат Қуанышбаев.
Шара барысында тәжірибелі мамандардың шеберлік сыныптары, тренингтер, пікір-алмасу алаңы ұйымдастырылды. Әр ауданнан келген пелагогтар жаңа идеяларын ортаға салып, тәрбие саласында заманауи әдіс-тәсілдерді көрсетті.
“Мектеп директорының тәрбие жұмысы жөніндегі орынбасары, педагог-психолог, әлеуметтік педагог, ұйымдастырушы, сынып жетекшісі, осы 5 маман бірлесіп бала тәрбиесіндегі күйіп тұрған мәселелердің шешімін іздедік. Пікірталас алаңы өте қызықты өтті. Тәжірибесі мол мамандардан біраз кеңес алдық”, — дейді қатысушы Айгерім Досанова.
Аталған байқау екі күнге созылады.
Мәулен Әнербай
