Қазақстан қарулы күштерінің Жетісу гарнизонындағы десанттық-шабуылдау бригадасының әскери қызметшілері жоспарлы парашютпен секіру жаттығуын сәтті орындады. Олардың арасында жауынгерлік шараны орындауға алғаш рет қатысқан 8 ару бар.
Жауаптылардың сөзінше, бұл бойжеткендер өңірдегі 37-ші десанттық-шабуылдау бригадасында бір жылдан астам уақыттан бері қызмет атқарып келеді. Парашютпен секіру әскери дайындықтардың бірі. Қыздар үшін көп қиындық тудырмаған.
– Парашютпен секіру – әуе-десант дайындығының ең күрделі әрі жауапты кезеңі. Ол аса жинақылықты және шеберлікті талап етеді. Жауынгер қыздар екі ай бойы биіктен секіруге дайындалды. Мұнда олар Д-6 төрт сериялы парашют жүйесінің барлық тактикалық-техникалық сипаттамалары мен құрамдас бөліктерін, дұрыс оралуын мұқият үйренді,– дейді әскери бөлім командирінің әуе-десанттық дайындық жөніндегі орынбасары, подполковник Данияр Сыдықов.
Жаттығудан соң әскери құрам командирі, полковник Алмас Төлегенов алғашқы секіруді мүлтіксіз орындаған десантшы қыздарды жүрекжарды қуанышымен құттықтады. Оларға гүл шоқтарын ұсынып, арнайы Алғыс хаттармен марапаттады.
Айдын КӘЛІМХАН
