Бала тәрбиесінде балабақшаның рөлі жоғары. Кішкентай бүлдіршін әуелі сол жерден әліпті таниды. Сондықтан ата-ана үшін тәрбие орнының маңызы жоғары. Жетісуда жүздеген балабақша бар, соның бірі – «№7-бөбекжай». Аталған мектепке дейінгі оқыту орны облыстың Үздік балабақшасы саналады.
2010 жылы «Балапан» бағдарламасы аясында ашылған №7-бөбекжай бақшасында 600-ге жуық бала тәрбиеленуде. Мекеме біртұтас тәрбие бағдарламасы мен мектепке дейінгі тәрбиелеу мен білім беру стандартын, үлгілік оқу бағдарламасын жүзеге асыруда ресурстық орталық ретінде IT- балабақша жобасымен жұмыс істейді. Толықтай заманауи құрал-жабдықтармен жабдықталған. Онда 26 топтық бөлмелер, музыка залы, дене шынықтыру залы, хореография залы, медициналық блок (дәрігердің бөлмесі, егу және оқшаулау кабинеті), меңгеруші кабинеті, әдістемелік кабинеті, есеп бөлімі, кадрлар бөлімі, шаруашылық бөлімі, ас блогы, психология кабинеті, логопункт, тұз кеніші, профилактикалық массаж кабинеті, кинетикалық құм, робототехника және қазақ тілі кабинеттері бар. Білікті педагогикалық кадрлармен қамтамасыз етілген.
«Балабақшамыздағы қамтылған 560 баладан өзге балабақша аумағында тұратын, бірақ балабақшамен қамтылмаған балаларды білім беру мен тәрбиелеу мақсатында ата-аналарға арналған консультациялық пункт жұмыс атқарады. Консультациялық пунктте 40 тан астам балалардың ата-аналары арнай білікті мамандарымыздан кеңес алады. Арнайы жабдықталған консультациялық пунктте баланың ата-анасына тек кеңес берумен ғана емес, сонымен қатар балаларға ойын алаңында болуға, қатарластарымен кездесе алуға мүмкіндік беретін бұл орталық өз қызметін балабақшаның жылдық жоспарына сәйкес әзірленген консультациялық пункт ережесімен, жоспарымен, күн тәртібімен регламенттелген. Балалардың болу ұзақтығы 30 минуттан 2 сағатқа дейін. Ата-анасының өтініші негізінде балаларға қатысты ата-аналарға арнайы мамандар кеңестерін береді. Сонымен қатар медбике, психолог өзге пән мұғалімдері де жұмыс атқарады. Консультациялық пункт тегін ұйымдастырылған», дейді Гульниса Тұлымшақова.
Оның айтуынша, арнайы тұз кеніші қызметінің нәтижесінде балаларың респираторлық және вирустық ауруларға шалдығу пайызы 40 тан 10 пайызға төмендеген. Ерте жастан кездесетін вальгус, сколиоз, түйетабанның алын алу мақсатында профилактикалық массаж кабинеті, тіл кемістігі, психикалық тежелуі бар балаларға арналған логопед дефектолог кабинеттері арнайы мамандардың қорытынды жолдамасында ұсынылған бағыттарын ескеріп, түзету жұмыстарын жүргізеді.
Балабақшамызда озық технологияларды балалардың түзету жұмыстарында қолдану бағыттарының бірі «Ақылды айна» құралы. Мұнда баланы диагностикалаудың әдісінен бастап жұмыс формаларын таңдауға дейінгі кезеңдер қамтылған. Мысалы баланың ауыз қуысының бұлшық еттерінің бос болуына байланысты да тіл кемістігі болуы мүмкін, сондықтан оны анықтау үшін май шамды сөндірейік диагностикасын алуға болады. Балаға май шамды көрсетіп үрлеткізеді. Бала үрлеген кезде оның қаншалықты үрлеу күші болғандығын анықтап, жұмыс жсопарын құруға болады. Жұмыс жоспарына да қарастырылған жаттығуларды алып, 3-10 ұйымдастырылған іс әрекет қоюға болады. Сол секілді бұл айнаның тағы бір ерекшелігі мультипликациялық ойындардың кіріктірілуінде болуда. Бала тек жаттығуларды ғана орындамайды сонымен қатар өзі танып білген кейіпкерлерінен мутльфильм жүйесін құра алады. Баланың барлық түзетулерін бірге қамтуға мүмкіндік береді. Жәй ғана тыныс алу техникасынан бастап, кем дыбыстарды тез меңгеріп кете алуға дейін қолданылады. Одан бөлек бала санасының дамуы үшін түрлі жобалар қолға алынған.
«Әжелер мектебінде бірнеше қол өнер, өсиет, шаш өру, тәрбиелік қыз балаға тән мінез-құлық, әдеп дағдылары меңгертіледі. Асыл Әжелеріміздің өсиетін еңбекке деген шеберлігін үйренген балалар болашақта адал, ұлтжанды еңбекқор парасатты болып өседі. Балабақшамыздың жобаларының бірі «Нағыз қазақ домбыра». Жоба биылғы оқу жылының әдістемелік нұсқау хатына сәйкес Ұлттық құндылықтарды дәріптеу аясында ұйымдастырылған. Осындай жобалар балабақшаның ата-аналарымен ынтымақтастығын нығайтып, әке мен ана, ата мен әжелер тарапынан мейірімділік пен бала тәрбиесіне оң әсерін тигізеді», дейді тәрбиеші Қарлығаш Баймолдина.
Айта кетейік, республикалық балалық шақ орталығының ұйымдастырылуымен өткен «Өнерлі бала», «Шебер әке, өнерлі ана, еңбекқор бала» және «Барлығына рахмет челленджінде» байқауында балабақша бүлдіршіндері 1- орынды жеңіп алған.
Мұхтар Күмісбек
