Соңғы уақытта әлемде болып жатқан барлық дағдарыстық құбылыстар мен тәуекелдерге қарамастан облыстың экономикалық әлеуеті нығайып келеді. Өндірістік сектор сенімді дамып, инвестициялар ағыны төмендемейді.
Жетісу бизнесі жоғары позицияға ие. Бұл сенімді іргетас және одан әрі ілгерілеуге жақсы негіз. Облыстық кәсіпкерлік және индустриялық-инновациялық даму басқармасының ақпараты бойынша биыл жыл басынан бастап өнеркәсіп өндірісінің көлемі 100,4 млрд. теңгені құраған, нақты индексі 112,%. Бұл өткен жылмен салыстырғанда біраз жоғары. Ең үлкен жетістікті өңдеу және тау-кен өнеркәсібі көрсетеді.
Биылғы бірінші тоқсанда «Қайнар АКБ» ЖШС, «Алацем» ЖШС, «Ақсуқант» ЖШС, «Текелі тау-кен өңдеу кешені» ЖШС, «Электромарганец» ЖШС сияқты Жетісу алпауыттары жақсы жұмыс істеді. Жыл соңына дейін өнеркәсіп өндірісі көлемін 330 млрд. теңгеге дейін жеткізу көзделіп отыр, ал 2025 жылға қарай ол 402,3 млрд. теңгеге өседі деп күтілуде. Облыс құрылғаннан бері 17 жаңа кәсіпорын іске қосылып, жұмыс істеп тұрған 2 кәсіпорын кеңейтілді. Аймақта барлығы 200-ден аса шағын және ірі өндіріс орындары жұмыс істейді.
Инвестицияларды тарту үшін қолайлы жағдайлар жасалған. Өткен жылы облыс экономикасына 269,7 млрд. теңге құйылды, бұл жоспардың 116,3%-ын құрайды. Ал биылғы жыл басынан бері 45 млрд.-қа жуық қаражат түсті. 2025 жылға дейін кемінде 573,5 млрд. теңге тарту көзделген. 2026 жылға дейін 7 мың жұмыс орнын құрумен 1,6 трлн. теңгеге 146 іске асырылатын жобалардың инвестициялық портфелі қалыптастырылып, мақұлданды. Оның ішінде 30 серпінді жоба «Қорғас – Шығыс қақпасы» арнайы экономикалық аймағының аумағында басталады.
Биыл жалпы құны 63,5 млрд. теңге болатын 52 ірі жоба басталып, 900-ден аса тұрақты жұмыс орны ашылады.
Сонымен бірге, Кербұлақ ауданында «Консалтингтік құрылыс тау-кен компаниясы» ЖШС, Панфилов ауданында «Қазақстан-Қытай халықаралық өнеркәсіптік қаласы» ЖШС, Достық стансысында «Dostyk Trans Terminal» ЖШС ірі жобалардың іске асуы жоспарлануда.
Айгүл БАЙБОСЫНОВА
