Талдықорғандағы кәсіпкерлер палатасы ғимаратында облыс әкімінің орынбасары Рустам Әлидің қатысуымен кәсіпорын өкілдерінің басын қосқан жиын өтті.
Достық-Мойынты теміржол учаскесінде жүргізіліп жатқан құрылыс және «Integra Construction KZ» құрылыс компаниясына жиналған кәсіпкерлер өнімін таныстырып, келелі мәселелерді бірлесе талқылады.
Достық-Мойынтыдағы екінші жолдың жұмысы қарқынды жүріп жатыр. Ал теміржолдың 450 шақырымы Жетісу жерінен өтеді. «Integra Construction KZ» компаниясы филиалының директоры Нұрлыбек Бекжановтың айтуынша, бұл жағдай кәсіпкерлерге өте қолайлы.
«Бүгінгі іс-шарада Жетісу өңірінен өтетін учаскеде аймақтағы компаниялардың өнімдерін жобаға қосу туралы ұсыныстар болды. Бәрін қарастырамыз»,– деді. Нұрлыбек Бекжанов.
Құрылыс «Қуатты өңірлер – ел дамуының драйвері» ұлттық жобасы аясында жүргізілуде. Жалпы ұзындығы – 836 шақырым.
Құрылыс барысында 419 құрылыс нысаны көзделген. Мәселен, 5 ірі көпір, 87 шағын және орта масштабтағы көпір, 288 су жүргізу құбыры, 14 автожол өткелі.
Сондай-ақ, энергетика және байланыс обьектілерін салу жоспарланып отыр. Құрылыс 2025 жылы аяқталады деп межеленген. Жаңа теміржол желісін қосу отандық өнімнің экспортын ұлғайтуға және елдің транзиттік әлеуетінің артуына ықпал етпек.
Қали АСҚАР
