Мамандардың айтуынша, бүгінде жалпы ел аумағында әр жыл сайынғы жол-көлік оқиғаларынан зардап шегетіндердің саны азаймай келеді. Оған түрлі оқиғалар себеп. Бұл дүйім жұртты алаңдатып отырған маңызды мәселелердің бірі. Мәселен, биылғы жылдың алғашқы 5 айында Жетісу облысында 24 жүргізуші жылқы және сиыр қағып жол апатына түскен. Бұл көреткіш өткен жылдың ұқсас мезгілімен салыстырғанда 5 жағдайға жоғары.
Жол саласына жауаптылардың сөзінше, аймақта шомылу маусымы басталған тұста оқыс оқиғалар саны тағы да арта түсуі мүмкін. Себебі, Алакөл мен Балқашқа ағылған туристердің көбеюіне байланысты күре жолдағы көлік қатынасы да жиілейді. Қазір қауіптің алдын-алу үшін «Қазавтожол «ҰҚ» АҚ» Жетісу облыстық филиалына қарасты «ҚАЖСЕРВИС» ЖШС қызметкерлері аттанысқа келіп сақтық шараларын күшейткен. Нақтырақ айтқанда олар «Алматы-Өскемен» күре жолының бойында орналасқан шаруашылықтарға барып, қожалық иелеріне қолдағы төрт-түлікті қараусыз жібермеуді ескертіп, жылқыларға жарық шағылыстыратын бау тағып берген.
– «ҚАЖСЕРВИС» серіктестігінің мамандары енді бір айдың ішінде мұндай лентаның тағы 200 данасын таратпақ. Өйткені мал қағу оқиғалары көбінде кешкі немесе түн мезгілдерде орын алады екен. Жазатайым жағдайға жол бермеу үшін «Алматы-Өскемен» тас жолының шамамен 160 шақырымына арнайы қоршау да орнатылды», — деді «ҚАЖСЕРВИС» ЖШС Жетісу облыстық филиалының бөлім басшысы Азамат Асылбаев.
Көлік апатын болдырмауды мақсат еткен аталған сала қызметкерлері енді жолдағы 100 мың жарық шағылыстыратын белгіні ауыстыруды жоспарлауда.
Айдын КӘЛІМХАН
