Кардиолог Магдалена Перельо дұрыс тамақтану адамның жүрек-қан тамыр жүйесіне үлкен ықпал ететінін айтады. Оның сөзінше, күнделікті рационымызда жиі кездесетін кейбір өнімдер жүрек ауруларының даму қаупін күшейтеді.
Мысалы, өңделген еттер – шұжық, сарделька немесе ветчина сынды тағамдар – құрамында шамадан тыс тұз, қаныққан май және химиялық консерванттар болады. Бұл заттар ағзада жиналып, қан қысымын арттырып, тамыр қабырғаларын зақымдайды.
Сондай-ақ тәтті газдалған сусындар мен жасанды шырындарда қант мөлшері өте жоғары. Қанттың артық тұтынылуы салмақ қосуға, инсулинге төзімсіздікке және жүрекке артық салмақ түсуіне себеп болады.
Печенье, тоқаштар мен чипсыларда жиі кездесетін транс майлары холестерин деңгейін жоғарылатып, қан тамырларының қабынуына әкелуі мүмкін. Ал қан айналымы жүйесіне түсетін бұл қысым жүрек ұстамасына алып келуі әбден мүмкін.
Сонымен қатар, күнделікті ас мәзірінен табылатын ақ нан да зиянды. Оның құрамындағы тазартылған көмірсулар қандағы глюкоза деңгейін жылдам көтереді. Бұл процесс артерия қабырғаларына зиян келтіріп, метаболикалық синдромның, 2 типті қант диабетінің және жүрек ауруларының дамуына ықпал етеді.
Тағы бір ескерерлік жайт – шамадан тыс тұз қолдану. Ағзада сұйықтықтың жиналуына себеп болатын тұз қан қысымын көтеріп, жүрекке қосымша күш түсіреді.
Осылайша, дұрыс емес тамақтану жүрекке қауіп төндіретін ең маңызды факторлардың біріне айналады. Маман дұрыс диета ұстану арқылы жүрек ауруларының алдын алуға болатынын айтады. Ол үшін жоғарыда аталған өнімдерді шектеу немесе мүлде тұтынбау, оның орнына табиғи әрі пайдалы тағамдарға – көкөніс, жеміс, жаңғақ, дәнді дақылдар мен балыққа басымдық беру қажет екенін атап өтті.
Өмір сүру сапасын жақсартқыңыз келсе, жүрегіңізді қорғау үшін дәл бүгіннен бастап дұрыс шешім қабылдаңыз.
”Жетісу-Ақпарат”
