Қазақстанда 25 тамыздан бастап жол қозғалысы ережелері мен жүргізуші куәлігін тоқтату тәртібіне маңызды өзгерістер енеді. Енді елдегі автокөлік тізгіндеушілер үшін құжаттан айырылудың тағы екі жаңа негізі белгіленді, – деп хабарлайды 7-su.kz ақпараттық порталы.
«Жол қозғалысы туралы» Заңға енгізілген түзетулерге сәйкес, 65-70 жастан асқан азаматтар мен мүгедектігі бар жүргізушілер арнайы медициналық бақылаудан өтіп тұруы тиіс. Егер цифрлық базада азаматтың көлік тізгіндеуге денсаулығы жарамды деген анықтамасы болмаса, бұл құжатты уақытша қайтарып алуға толық негіз береді.
Егер жүргізуші куәлігі медициналық ақпараттың жоқтығынан тоқтатылса, оны жүйеге жарамдылық туралы ресми қорытынды енгізілгеннен кейін бірден қалпына келтіруге болады.
Екінші жаңа себеп – рульге мас күйінде отырып, қылмыстық ісі түпкілікті үкімсіз жабылған тұлғаларға қатысты. Мәселен, рақымшылыққа іліккен, ескіру мерзімі өткен немесе есі дұрыс емес деп танылған азаматтар енді жауапкершіліктен босатылғанымен, жүргізу құқығынан айырылады.
Жаңа тәртіп бойынша мұндай жүргізушілер 7-8 жыл күтуге мәжбүр болады. Осы мерзім өткен соң ғана қайтадан медициналық тексеруден өтіп, жол ережелері теориясын тапсыру арқылы куәлігін қайтара алады.
