«Қазгидромет» РМК синоптиктері 7 қарашаға арналған ауа райы болжамын жариялады. Мамандардың хабарлауынша, еліміздің көп өңірінде қар жауып, бұрқасын мен көктайғақ күшейеді, деп хабарлайды 7-su.kz ақпараттық порталы.
Жетісу облысының таулы аймақтарында тұман түседі. Солтүстік-шығыстан жел соғып, Алакөл көлдері ауданында екпіні 15-20 м/с-қа дейін жетеді.
Алматы облысының солтүстігі мен оңтүстігінде, таулы аудандарында да тұман күтіледі. Алматы қаласында түнде және таңертең көру қашықтығын шектейтін тұман байқалады.
Абай облысының батысы мен солтүстігінде қар жауып, жаяу бұрқасын мен көктайғақ орын алады. Күндіз облыстың шығысы мен орталығында да жаңбыр мен қар аралас жауын-шашын байқалып, жел екпіні 25 м/с-қа дейін күшейеді.
Шығыс Қазақстан облысының батысында, солтүстігінде және оңтүстігінде қар мен көктайғақ болады. Желдің жылдамдығы 23 м/с-қа дейін артады.
Астанада көктайғақ күшейіп, оңтүстік-батыстан соққан желдің екпіні 15-20 м/с шамасында болады.
Павлодар облысында жаңбыр мен қар аралас жауын-шашын жауып, облыстың батысы мен оңтүстігінде бұрқасын мен көктайғақ байқалады.
Қостанай, Ақмола, Қарағанды және Солтүстік Қазақстан облыстарында да жаяу бұрқасын, көктайғақ және тұман тіркеледі. Кей жерлерде желдің екпіні 25-28 м/с-қа жетуі ықтимал.
Жамбыл облысының батысы мен оңтүстігінде, таулы аудандарында тұман түсіп, жел күшейеді.
Маңғыстау мен Атырау облыстарында түнде және таңертең тұман болады.
Түркістан облысының таулы және тау бөктерлі аудандарында көріну қашықтығы нашарлап, тұман түседі.
Батыс Қазақстан облысының батысы мен шығысында да тұман түседі.
