Әлемдік деңгейде мәртебесі биік діни мереке саналатын Құрбан айт қарсаңында өңірлік коммуникациялар қызметінде биылғы айт мерекесіне дайындық жұмыстары мен ерекшеліктері талқыланды. Тілшілермен тілдесуге арнайы келген дінтанушы Құрметхан Байғара мен дін істері басқармасы дін саласындағы мәселелерді зерттеу орталығының маманы, дінтанушы Дәулет Қазкенов айт күніне арнаулы шаралар тізімімен таныстырса, орталық «Иман» мешітінің наиб-имамы Ардақ Оразбаев құрбандық игіліктерін айтып өтті.
Құрбан айт барша мұсылманға ортақ ұлық мейрам. Алдағы дүйсенбі сол қасиетті мерекенің алғашқы күні. Бұл ерекше күнде мал шалынып, ақ түйенің қарны жарылады. Қажылық өтеушілер Қағбаға жүзін қаратып, дұға оқиды. Дүйім мұсылман баласы құрбандық шалу арқылы бір-бірін дінге беріктік танытуға шақырады. Құрбандық тек мал бауыздаумен ғана шектелмейді. Онда адамның ішкі ниеті, шын пейілі, басқаларға жанашырлығы таразыға түседі. Сондай-ақ, пенденің пендешілігі мен мәрттігі, сараңдығы мен жомарттығы да сыналады. Жалпы айтқанда бұл ұлық мереке күллі мұсылман жұртшылығын бір-біріне жанашыр, өзара мейірімді болуға, қамқорлық жасауға, қиналғандарға көмектесуге, жағдайы төмен жамағатқа қарасуға шақырады.
Бұрынғыдай емес, бүгінгі таңда діннің дәріптелуі жоғары деңгейде. Күнтізбеден ойып тұрып орын алған күн мұсылмандар үшін ең үлкен екінші мереке. Ал алғашқысы ол жақсылыққа шақырып, барды бағалауға үйрететін ораза айт екені белгілі. Дәулет Серікұлының айтуынша облыс көлемінде 579 діни бірлестік бар. Міне, қазір соның барлығында Құрбан айт күніне дайындық жұмыстары жүргізілуде. Биылғы Құрбан айттың былтырғыдан қарағанда, ерекшеліктері де баршылық. Мәселен, өткен жылда ұйымдастырылған қайырымдылық саны биыл артып тұр. Сондай-ақ құрбандық шалып, мал сою үшін әр жануарды жеке жіліктейтін кабиналар жасалған. Яғни, құрбандыққа түсетін түліктерді бір-біріне көрсетпей бауыздамақшы. Бұл жануардың сескеніп, бойында қаны қалып қалмауына септігін тигізбек. Биыл қасап жұмыстарын жүргізетін арнайы 89 орын белгіленген. Сондай-ақ, Талдықорған өңіріндегі Иман орталығында осыған дейін 60 қасапшы оқып, білім курстарынан өткен. Барлығы халал союдың жолдарын үйреніп, арнайы сертификат алған. Әр қасапшыға жеке мөр де табысталған.
Теолог, дінтанушы Құрметхан Байғара өз сөзінде құрбандық етінің үшке бөлінетінін айтып өтті. Бір бөлігі өз отбасыңа, ал екіншісі жетім-жесірлерге, үшінші бөлігі көрші-қолаңға таратылуы керек екен. Биылғы айт мерекесіне дайындық жоғары. Ардақ Нүсіпханұлы мешіттерде ұлттық ойын түрлері ойнатылып, қала көшелерінде қайырымды істердің жоспарланғанын айтып өтті. Айт намазынан кейін көңілі қалап, жақсылық жасауға асыққан жүргізушілер, алыста тұратын болмаса кембағал жандарға көмек көрсету үшін мешіт тұрағында тегін такси қызметін ұсынбақ. Сондай-ақ, қала ішінде қоғамдық көлікте жеңілдік болып, 400-400 такси қызметі жеңілдетілген бағамен тұрғындарды тасымақ. Биылғы айттың басты жаңалығы «Құрбан айт қоржыны» болмақ. Тұрғындарға тартылар бұл сыйлықтың ішінен балаларға арналған тәттілер мен көңіл қуантарлық базарлық та табылады. Міне, осындай өзгерістер көбейіп, мереке аясы кеңейіп келе жатқанына биыл төртінші жыл. Найб-имамның сөзіне жүгінсек, жалғыз «Иман» мешітінің өзі әкімшіліктен алынған тізім бойынша 500-ге жуық мұқтаж жандарға көмек беруде. Орта есеппен 16 отбасына 1 тонна ірі қара еті бөлінбек. Сондай-ақ, жылдағыдай «Айналайын» балалар үйіне үлкен көмек көрсету жоспарда бар. Брифинг барысында мамандар құрбандық шалудың жөнін білмей, қой сойсам болды дегендерге айтылар ескертпені де ұмытпады. Құрбандыққа шалынар қой түлігі 6 айдан кіші болмауы тиіс және еркегін сойған жөн. Ал сиыр малынан керісінше ұрғашысын сойған ұтымды. Шамасы келгендер бір қойдан құрбандық ету керек. Ал жеті адам бірігіп ірі қара сойса бұл да құрбандық болып саналады. Сондай-ақ, дінтанушылар Құрбан айттың қасиеті Арафадан екенін айтып өтті. Арафа айтқа бір күн қалғанда болатын ораза тұту күні. Талдықорған өңірі бойынша айт намазы таңғы сағат 7.00-де оқылмақ. Жоқ-жітік қуанышқа бөленіп, сансыз сауапқа кенелетін күннің қасиетін сезінейік.
Ай Ниса.
