Бала кезімнен атам мен әжемнің тәрбиесінде өскен ұлмын. Анам өмірдің қиындығына қарамай, мені жеткізу үшін жанын салып, жұмыс істеуде. «Әке» деген мен үшін ауыр тақырып, ол туралы сөз қозғағым келмейді.
Әкесіз өссем де өз-өзімді жігіт ретінде шыңдау үшін спортқа қатысамын. Ережесіз жекпе-жекпен айналысқаныма бес жыл болды. Өнерден де құралақан емеспін, сурет саламын. Мұқағали атамыздың топырағында жаралғандықтан өлең оқу және сөйлеу жағынан бойыма дарыған талант бар, түрлі кештерде жүргізушілік қабілетімді де сынап жүрмін. Актерлік курста оқыдым. Азаматтық құқық мектебінде білім алдым. Дебаттарға да қатысамын.
Болашақта әскери дәрігер болғым келеді. Ол арқылы өзіме қызықты әскери салада қызмет етіп, сарбаздардың денсаулығын тексеріп, емдеп, азамат ретінде еліміздің болашағына үлесімді қоссам деймін.
Ендігі арманым – мектепті үздік бітіріп, Ұлттық бірыңғай тестілеуді сәтті тапсырып, білім беру грантын иелену. Сол арқылы анама салмақ түсірмей, жоғары оқу орнына өз күшіммен түскім келеді. Алға қойған мақсатым көп. Соған жету жолында талмай ізденіп, бар күш-жігерімді салудамын.
Мирас БИСЕМБАЕВ,
№59 мектеп-гимназияның 11-сынып оқушысы
Алматы қаласы
