В.Маяковский атындағы қалалық орталық кітапханасында «Kitap Time–2025» кітап фестивалі өтті. Шараның негізгі мақсаты – жас буынды кітап оқуға баулу, интеллектуалды жастарды ынталандыру және ұлттық мәдени құндылықтарды насихаттау.
Кеш шымылдығы Мәулеш Әбіжапаров пен Азамат Үмбетовтың орындауындағы «Отан» әнімен ашылды.
Шараға ҚР білім беру ісінің үздігі Жұмабала Балақаранова, ҚР Мәдениет қайраткері, танымал журналист Жұмахмет Жайлаубаев, ақын, жазушы Айдын Кәлімхан, балаларға арналған кітаптардың авторы Нұржан Кәпқызы, ҚР Жазушылар одағының мүшесі, ақын Мұхтар Күмісбек және «Jetisý» газетінің тілшісі Санжар Сұлтанғазы қатысты.
Жастарға кітаптың құндылығы жайында сөз қозғаған Жұмахмет Жайлаубаев:
– Кітапты жас кезден оқыған жөн. Балалық шағымда әр кеш сайын май шамның түбінде сан алуан ертегі, шығармалар оқитынмын. Казір соның арқасында білікті маман иесі болып, бала кездегі арман-мақсаттарымды жүзеге асырудамын, –деп естелігімен бөлісті.
Келген қонақтар да кезегімен сөз алып, кітаптың қоғамдағы рөлі, жастар тәрбиесіндегі орны жөнінде ойларымен бөлісті. Қонақтарға сұрақтар қойып, пікір алмасты.
Фестиваль барысында жас оқырмандар таланттарын паш етіп, шығармашылық өнерлерін ортаға салды. Белгілі ақындардың жыр- шумақтары оқылып, қатысушылар ерекше әсер алды.
Кездесу соңында белсенді оқырмандар мен қатысушыларға Алғыс хаттар табысталды. «Kitap Time-2025» кітап фестивалі қаланың мәдени өмірінде мәні зор іс-шара ретінде бағаланып, жас буынның кітапқа деген қызығушылығын арттыруға ықпал етті.
Диана ОРАЗБЕК
ЖУ студенті
