Ауылым

Ауылым – бақ мекенім,
Ауаңның тәтті екенін,
Адамдар татулығын,
Жырлаумен мәңгі етемін.

Ауылым – ақ бесігім,
Ашық-ау әр есігің.
Бөтен жоқ арамызда,
Белгілі бар есімің.

Ауылым – асыл әнім,
Шет кетсем асығамын.
Суыңнан қанып ішіп,
Шат күліп басыламын.

Сен менің жұмағымсың,
Ауылым – қуанышым.
Басыңнан бақ таймауын,
Тәңірден сұрадым шын.

Алтын ұя

Мектебім – білім бұлағы,
Шәкіртке ашық құшағы.
Балапан боп кіреді,
Қас қыран боп ұшады.
Табылар барлық керегің,
Тәрбие, білім береді.
Екінші – анаң ұстазың,
Баланы дарын көреді.
Бойыңа білім жұғатын,
Еңбекпен артар қуатың.
Азамат етіп өсірер,
Өмірдің мәнін ұғатын.
Мектепте өтер көктемің,
Балалық өмір өткелің.
Шегі бар оның қоштасар,
Байқамассың өткенін.
Серметкен шыңға қиялды,
Ұмытпа ұшқан ұяңды.