Сапар Жарлыөзек ауылдық округіндегі «Қыдырәлі» шаруа қожалығының қант қызылшасы егістігінен басталды. Мұнда аудан әкімі егіс алқабының жай-күйімен танысып, агротехникалық талаптардың сақталуы мен өнім көлемінің болжамын зерделеді. Қызметкерлермен кездесіп, егіннің өсу барысына қатысты ұсыныстарын айтып, қолдауды жалғастыратынын жеткізді.
Ислам даму банкінің қаржыландыруымен жүзеге асырылып жатқан суару жүйелерінің құрылыс жұмыстары да назардан тыс қалмады. Мердігер компания өкілдерімен кездесіп, нысандардың сапалы әрі уақытылы аяқталуы туралы нақты тапсырмалар берілді.
Сапар барысында Балпық би ауылдық округіндегі «Тәуелсіздік Агро» ЖШС-нің көкөніс алқаптарын да аралады. Аудан басшысы суару технологияларының тиімділігіне назар аударып, еңбек өнімділігін арттыру, заманауи әдістерді қолдану, суды үнемдеу бағытында ұсыныстарын айтты.
Жарлыөзек ауылында салынып жатқан Мәдениет үйі мен халықтың әлеуметтік осал тобына арналған 5 жалгерлік тұрғын үй құрылысын да көріп қайтты.
Аудан әкімі құрылыс жұмыстарының сапасы мен мерзіміне айрықша мән беріп, жауапты мамандарға нақты міндеттер жүктеді.
Бұл іссапар ауданның әлеуметтік-экономикалық даму бағытында қолға алынған шаралардың жүйелі әрі тиімді жүзеге асырылып жатқанын көрсетті. Аудан басшылығы алдағы уақытта да халықтың тұрмыс сапасын арттыру мен ауыл шаруашылығын дамыту жолында нақты жұмыстар жүргізуді жалғастырмақ.
Аружан ЖАҚЫП
