Халқымыз ғасырлар бойы мәдениеті мен өнерін, дәстүрі мен асыл мұрасын алтын бесігінде тербетіп келеді. Қай заманда да біздің еліміз ертеңгі күнге зор сеніммен қарап, рухын жоғары ұстаған. «Мәдениет – мәңгілік қазына, өнер – өшпес мұра» десек, қатарынан бірнеше жыл тойланып келе жатқан мәдениет және өнер қызметкерлері күнінің басты мақсаты – мәдениетіміз бен салт-дәстүрімізді дәріптеу. Әрине, басын тауға, аяғын шөлге, арқасын құмға төсеген берекелі жерді мекен еткен Жетісу өңірі бекзат өнерден кенде емес. Айтулы күнге орай І. Жансүгіров атындағы Мәдениет сарайында түрлі өнердің тізгінін ұстап, жұлдыздай жарқыраған бір топ жан мен рухтың қызметкерлері марапатталды. Шараға қатысқан облыс әкімі Амандық БАТАЛОВ алдымен көрмені толық аралап шығып, өнер ұжымдарының жай-күйімен танысты.Осыдан кейін облыс әкімі жиналған көпшілікті төл мерекелерімен құттықтап, сөз сөйледі.
– Қадірменді мәдениет пен өнер саласының қызметкерлері! Сіздерді төл мерекелеріңізбен шын жүректен құттықтай отырып, еңбектеріңізге табыс, отбасыларыңызға бақ-береке тілеймін. Елбасымыз Нұрсұлтан Әбішұлы: «Мәдениет – елдің ең басты рухани байлығы, асыл мұрасы. Қай елдің мәдениеті мықты дамыса, сол елдің еңсесі де биік болады», – деп атап өтіп: «Еуразияның ең бір бай да бірегей мәдениеті – қазақ мәдениеті», – деген еді. «Өнер – ұлттың жаны», – дейді халық даналығы. Өркениетті ұлт, ең алдымен, тарихымен, өнерімен, әлемдік мәдениеттің алтын қорына қосқан үлесімен танылып, бағаланады. Ұлттық мәдениеттің бір бөлігі, Жетісу өлкесі – қасиетті өнердің киелі бесігі, дарынды тұлғалардың мекені, – деді облыс әкімі құттықтау сөзінде.
Әкімнің айтуынша, облысымыздың мәдениет саласы қызметкерлері елдігімізді, ғасырлар бойы мұра болған асыл қазынаны – ұрпаққа жеткізу жолында ауқымды жұмыстар атқаруда. Өз сөзінде Амандық Ғаббасұлы өнерді құрметтеп, мәдениетті өркендету – баршамыздың ортақ мақсатымыз екенін атап көрсетті. Басқасын айтпағанда, биылғы қаңтар айында «Әлем таланттары» қорының арнайы шақыртуымен Мұқан Төлебаев атындағы ұлт аспаптары оркестрі Мәскеу қаласына барып, ұлттық өнерімізді дәріптеп қайтса, Сүйінбай атындағы облыстық филармонияның бірнеше өнер иелері Қытай Халық Республикасының Үрімжі қаласында болып, ел алғысына бөленді. Астана қаласында өткен «Ақ көгершін» халықаралық балалар шығармашылық фестивалінде «Солнышко» балалар хореографиялық ансамблі Гран-при иегері атанған.
Сондай-ақ, өңірімізде өнермен ұлы із қалдырған дарындарға құрмет көрсетілді. Осыған орай, биыл Қазақстанның Халық әртісі Дәнеш Рақышевтың 90 жылдығына арналған шаралар, Қазақстанның Халық әртісі, әнші Зейнеп Қойшыбаева атындағы «Жауқазындай жайдарлы үн», Мұқағали Мақатаевтың сөзіне жазылған «Жырлайды жүрек» облыстық байқауы өтті. Облыс бойынша Жамбыл Жабаевтың 170, мемлекет қайраткері Әлихан Бөкейхановтың 150, Мұқағали Мақатаевтың 85 жылдығына орай түрлі мәдени іс-шаралар ұйымдастырылды.
Облыс әкімі осы ретте бар өмірін мәдениет саласына арнап, талмай еңбек етіп келе жатқан өнер саңлақтарына тоқталды. Қазақстанның Халық әртісі, «Құрмет» орденінің иегері Алмахан Кенжебекова, Қазақстанның еңбек сіңірген әртісі, «Парасат» орденінің иегері Өмірсерік Қалиев, Қазақстан Республикасының еңбек сіңірген әртістері Ұлжан Айнақұлова, Қанат, Айткүл Құдайбергеновтер, Тұрсынхан Қарақожаева, Қазақстан Республикасының еңбек сіңірген қайраткері, «Құрмет» орденінің иегері Әли Алпысбаевтың есімдері ерекше аталды. Сондай-ақ, облыс басшысы биылғы жыл өңіріміздің мәдениет саласы үшін табысты болғанын да тілге тиек етті.
Оның айтуынша, өңіріміздің мәдени дамуын, жаңа жетістіктерін көрсету, саланың материалдық-техникалық базасын нығайту, әншілердің, өнер ұжымдарының шеберліктерін шыңдау, дарынды жастарға қолдау білдіру облысымызда мықты қолға алынған. Алыптар туған мекеннің мәдениетін өрлету үшін облыстық мәдениет саласына бөлінетін қаржы жыл сайын артып, бүгінде бюджеті 4,5 млрд. теңгені құрап отыр. Соның нәтижесінде ұлттық құндылықтарды түгендеуге бағытталған «Мәдени мұра» бағдарламасы сәтті жүзеге асырылды. Сондай-ақ, облыстық бюджеттен мәдениет мекемелеріне күрделі жөндеу жұмысы жасалып, материалдық-техникалық базасы ретке келтірілді. Облыс басшысы шарада бірқатар өнер адамдарына Құрмет грамотасын табыс етті. Сондай-ақ, мәдениет саласы ұжымдары мен қызметкерлері арасында 16 аталым бойынша жүргізілген байқауда жеңімпаз атанған ұжымдар мен өнерпаздарды марапаттады. Сол қатарда «Үздік мәдениет мекемесі» аталымының жеңімпазы М. Тынышпаев атындағы облыстық өлкетану музейіне жеңіл автокөліктің және облыс әкімі атынан алыс-жақын шетелге шығып, Жетісудың, тіпті тұтас қазақ елінің мерейін асырып жүрген Жамбыл аудандық «Сүйінбай сазы» фольклорлы-этнографиялық ансамбліне су жаңа шағын автобустың кілті берілді. Осыдан кейін мінберге көтерілген мәдениет саласының ардагері Надежда Лушникова өз ойын өлеңмен өрнектеп, өнер қызметкерлерін төл мерекесімен құттықтаса, Алакөл аудандық мәдениет және тілдерді дамыту бөлімінің басшысы Арнұр Садықов мәдениет пен өнер саласына жасалып жатқан жақсылықтарды тілге тиек етіп, әріптестерін алдағы уақытта биік белестерден көрінуге шақырды.
Шара «Өнер – өшпес мұра» атты концерттік бағдарламамен жалғасты. Әнмен әрленіп, бимен көмкерілген шара көптің көңілінен шығып, жұрттың алғысына бөленді.
Қажет АНДАС
