Елбасы Нұрсұлтан Назарбаев Қазақстан халқына арнаған «Төртінші өнеркәсіптік революция жағдайындағы дамудың жаңа мүмкіндіктері» атты Жолдауында 10 бағыт бойынша маңызды міндеттерді атап көрсетті.
Елбасымыз әр жылғы Жолдауларында білім саласына айрықша назар аударып келеді. Биылғы Жолдауда адами капиталды жаңғырту негіздеріне баса көңіл бөлінген. Әсіресе, мұғалімдердің жалақысы біліктілігінің расталуына байланысты 30 пайыздан 50 пайызға дейін өсетіні туралы хабарды ұстаздар қауымы ерекше ықыласпен қабылдады. Президент осы мақсатқа биыл қосымша 67 миллиард теңге бөлу керектігін айтты.
Жолдауда білім саласының барлық сатысы бойынша нақты міндеттер айқындалған. Атап айтсақ, Президент орта мектеп, колледж, жоғары оқу орындары үздік оқытушыларының бейнесабақтары мен бейнелекцияларын ғаламторға орналастыру керек екенін атап өтті. Мұның өзі еліміздің түкпір-түкпіріндегі ұстаздарға қолжетімді әрі пайдалы дүние болатыны сөзсіз. Озық білім мен үздік тәжірибе сабақтасса, саланың дамуына ерекше үлес қосары анық. Сонымен қатар бұл ауыл мен қала білімін теңестіруге жағдай жасайды деп ойлаймын.
Білім берудің барлық деңгейінде математика және жаратылыстану ғылымдарын оқыту сапасын күшейту керектігі айтылды. Бұл жастарды жаңа технологиялық қалыпқа дайындаудың маңызды шарты.
Жолдау жаңа әлемге, яғни, Төртінші өнеркәсіптік революция әлеміне бейімделу мен жетістікке жету жолын табу үшін не істеу керектігін айқындайды. Сондықтан бұл Жолдауды ел келешегінің жарқын болуына бастайтын қадам деп білемін. Жаңа әлем көшбасшыларының қатарына білім беру жүйесін жаңа сапаға көтеру арқылы ғана қол жеткізуге болады. Ұлттың әлеуетін арттыруда және озық әрі жаһандық көзқарасы бар болашақты тәрбиелеуде педагогтардан үлкен міндет талап етіледі. Осы артылған жүкті әр педагогтың жауапкершілікпен орындайтынына сенімдімін.
Жанар Дихамбаева,
облыстық әдістемелік кабинеттің әдіскері
