Мемлекет басшысы Қасым-Жомарт ТОҚАЕВ Қазақстан халқына кезекті Жолдауын жариялап, ел дамуының жаңа басымдықтарын айқындап берді.
Бірден байқадық, жеті тараудан тұратын бұл Жолдауда болашаққа батыл қадам жасалған көп жаңалық бар. Негізгі басты мақсат – еліміздің тұрақты әлеуметтік-экономикалық дамуына жаңа серпін беріп, жаппай жаһандану кезеңі қарқын алып отырған қазіргі шақта еліміздің қауіпсіздігін қамтамасыз ету. Сол үшін де Мемлекет басшысы ел алдына жаңа міндеттер қойып отыр.
Жолдауда білім беру саласы – елдің болашағының негізі ретінде ерекше аталды. Бұл – ұстаздар мен білім беру мекемелеріне үлкен сенім мен зор жауапкершілік жүктейтіні анық. ХХІ ғасыр – білімділер ғасыры. Сондықтан да біз заман көшінен қалмай, білімді де білікті, парасатты, рухты, жігерлі ұрпақ тәрбиелеуге міндеттіміз. Жаңа білім беру стандарттары мен цифрландыру, заманауи технологиялар оқу үдерісіне кеңінен енгізіледі.
Сапалы білім алған елдің болашағы жарқын, келешегі кемел болатыны заңдылық. Қазіргі таңда жалпыға қолжетімді білімді бәріне бірдей беру үшін ғаламтор желісінің жылдамдығы жоғары және білім берудің цифрлы ресурстары қолжетімді болуы нәтижелі жұмыстың кепілі екендігін Мемлекет басшысы нақтылап өтті. Демек, бүгінгідей ақпарат пен жаңа технологияның дамыған уақытында біз балаларға жан-жақты білім беруде жаңашылдыққа баса назар аударғанымыз жөн.
Біз ұстаздар қауымы үкілеген үмітін арқалап келген әрбір оқушының білімді, тәрбиелі, иманды, саналы, озық ойлы тұлға болып қалыптасуына өз үлесімізді қосуымыз қажет. Себебі, Жаңа Қазақстан – болашақ жастардың қолында.
Гаухар ОРДАҒУЛОВА,
№30 орта мектептің орыс тілі мен әдебиеті пәні мұғалімі
Талдықорған қаласы
