Су ресурстары және ирригация министрінің жауабына сәйкес, облыста екі жаңа су қоймасы салынбақ, бірақ бұл мәселенің шешілуі уақытты талап етеді.
Мәжіліс депутаты Ерлан Саиров Қазақстандағы су мәселесі жайында пікір білдіріп, Батыс Қазақстан аймағындағы судың тиімсіз пайдаланылуын өткір сынға алды. Ол бұл мәселені көтеріп, халыққа арналған мәжіліс сұрағы кезінде министрге нақты мысал келтірді.
Сіздің есебіңізде Қазақстандағы су мәселесі жағдайы өте жақсы, жайма-шуақ. Бірақ өмірде олай емес қой. Қазақстанның қай аймағы болса да, су жетіспеушілігі бар. Мен сізге бір-ақ мысал келтірейін. Батыс Қазақстан облысындағы Қазталов ауданы суды Ресейден алып отыр. “Қазсушар” жылына 5 млрд теңге беріп, Ресейден су алады. Бірақ сол су келеді де, Жалпақталдан өтіп, әрі қарай құмға сіңіп кетеді. Сонда біз жылына бюджеттің 5 млрд теңгесің құмға сіңгізіп отырмыз. Жалпақталда су қоймасын салу жобасы осыдан он жыл бұрын басталған, әлі аяқталған жоқ. Міне, осы мәселені сіздер қашан шешесіздер? Біз бюджеттің ақшасын қашанға дейін құмға сіңгізіп отырамыз? – деп атап өтті.
Министр Нұржан Нұржігітов Батыс Қазақстанда екі жаңа су қоймасын салу жоспары бар екенін мәлімдеді.
Батыс Қазақстанда екі су қоймасын саламыз. Дұрыс айтасыз, Ресей мемлекетінен біз жыл сайын сол жаққа суды беру үшін келісімшартқа отырамыз, қаражат бөлеміз. Себебі оны шешудің басқа жолы жоқ. Ертең екі су қоймасын саламыз, олардың сыйымдылығы – 50-60 млн текше метр. Ал біз жылына сол жерге Ресейден 350 млн текше метр алып жатырмыз. Сондықтан бұл әрі қарай тетігі жалғасын табады деп айтуға болады. Су жерге кеткенімен, ол сол өзіміздің Батыс Қазақстан жеріне кетіп жатыр. Ол бәрібір өзінің жалпы экологиялық әсерін береді. Сондықтан бекер қаражат бөліп жатырмыз деп айта алмаймыз, — деп жауап берді ведомство басшысы Мәжілісте.
Дереккөз: baq.kz
