Күзгі жиын-терін жұмыстарына алғашқылардың бірі болып кіріскен «Самал», «Абдрахимов» және «Смағұлов» шаруа қожалықтарының еңбеккерлері бүгінде алқап басында бел жазбай еңбек етуде. Айта кетерлігі, «Абдрахимов» шаруа қожалығы қант қызылшасын полиэтиленді су құбыры арқылы суарып, өнімділіктің артуына елеулі әсер еткен.
Жылдағыдай «Самал» шаруа қожалығы алғашқы өнімін қант зауытына өткізді. Қожалықта тұрақты түрде 30 адам, ал маусым кезінде қосымша 20 адам жұмыс істейді. Шаруашылық басшысы Ермек Сағындықұлы Қалиев – қара жердің қайтарымын еселеп жүрген тәжірибелі диқан. Қожалықтың жалпы жер көлемі 1005 гектарды құрайды. Оның ішінде 601 гектар – егістік жер, оның 164 гектары суармалы, 437 гектары тәлімді, ал 404 гектар – жайылымдық алқап.
Биыл «Самал» шаруа қожалығы 240 гектар жерге қант қызылшасын еккен. Жиын-терін жұмыстары 1 қазаннан басталып, бүгінде қарқын алып отыр. Қазіргі таңда 35 гектардан 1750 тонна өнім алынған, оның 750 тоннасы қант зауытына өткізілген.
Шаруалардың айтуынша, қазан айының жылы әрі қолайлы ауа райы қант қызылшасын жинауға өте тиімді. Сондықтан жаз бойы төккен маңдай тердің жемісін қар түспей тұрып толық жинап алу үшін диқандар бар күш-жігерін жұмсап отыр.
Қорытындылай келгенде, жер емген еңбекқор диқандардың тынымсыз еңбегі мен жаңа технологияны тиімді пайдалану тәжірибесі Сарқан өңірінің ауыл шаруашылығын жаңа белеске көтеріп отыр.
Жақсылық ИГІМАН
