Туризм және спорт министрлігі «Дене шынықтыру және спорттың цифрлық платформасы» (e-Sport) ақпараттық жүйесін іске қосу жұмыстарын жүргізіп жатыр, – деп хабарлайды 7-su.kz ақпараттық порталы.
Бұл бірыңғай ақпараттық портал спортшылар, жарыстар және спорттық нысандар туралы мәліметтерді қамтитын болады.
Жүйенің негізгі міндеттері:
-
спортшылардың, жаттықтырушылардың, төрешілер мен әдіскерлердің бірыңғай дерекқорын құру;
-
спорттық біліктілікті және спорт ұйымдарына мүшелікті электрондық форматта растау;
-
спорттық-бұқаралық іс-шаралардың электрондық күнтізбесін жүргізу;
-
спорт нысандарының бірыңғай тізілімін қалыптастыру;
-
мемлекеттік қызметтерді проактивті цифрлық форматқа көшіру.
Қазіргі таңда пилоттық режимде спортшы, жаттықтырушы және төрешілердің электрондық паспорттары, іс-шаралар күнтізбесі, сондай-ақ спорт ғимараттары тізілімдерінің модульдері іске қосылған. Жүйені деректермен толықтыру және оның функционалын тестілеу жұмыстары жүргізілуде. Платформада қазірдің өзінде 83 федерация мен 50 ұйым жұмыс істейді.
Айта кетейік, спорттық атақтар беру тәртібі өзгеріссіз қалады. Ол 2014 жылғы 29 шілдедегі №300 бұйрықпен бекітілген ережелер бойынша жүзеге асады. Құжат атақтың жарамдылығын растайды және куәлік жоғалған жағдайда оны қалпына келтіруге негіз болады. Бұл үшін Спорт және Дене шынықтыру істері комитетіне жазбаша өтініш беру қажет.
