«Жетісу Медиа» ақпарат алаңында өткен жиында облыстық ветеринария басқармасы басшысының орынбасары Дархан ӘБІЛБАЕВ мал шаруашылығын цифрлық бақылау туралы әңгімеледі.
Оның айтуынша, аймақта ауыл шаруашылығы жануарларын бірдейлендіру және аурулардың алдын алу шаралары жүйелі жүргізілуде. Облыс бойынша 3 млн.-нан астам мал компьютерлік дерекқорға тіркелген. Бұл көрсеткіш өткен жылдың ұқсас мезгілімен салыстырғанда 0,5 пайыз өскен.
Жануарларды аса қауіпті жұқпалы аурулардан қорғау мақсатында 7,8 млн.-нан астам екпе жасалып, 1,3 млн.-нан астам малдан қан сынамасы алыныпты. Атап айтқанда, сібір жарасы, аусыл, нодулярлы дерматит, күл, пастереллез секілді ауруларға қарсы шаралар кешенді жүргізілген. Бруцеллез дертіне шалдығу дерегі өткен жылмен салыстырғанда 89 пайызға азайған.
Спикердің баяндамасында биыл облыс аумағында аса қауіпті ауру ошақтары тіркелмегені айтылды. Бұған малға дер кезінде екпе жасау мен мониторингтік жұмыстар себеп болған көрінеді.
Ветеринариялық қызметтің сапасын жақсарту үшін материалдық-техникалық базасын жаңартуға ерекше назар аударылған. Осы мақсатта 2023 – 2025 жылдары 1,9 млрд. теңгеден астам қаражат бөлініп, 72 ветеринариялық пункт, 1 стансы салынып, 78 арнайы автокөлік пен 217 компьютер, 238 планшет және басқа да құралдар сатып алынған.
Мал иелері үшін «TortTulik» мобильді қосымшасы іске қосылып, бүгінде оны 36 мыңнан астам адам қолдануда. Бұл қосымша арқылы малдарды тіркеу, екпе егу, сатып алу-сату, сойып өткізу сияқты қызметтер автоматтандырылған.
Облыста ветеринариялық-санитарлық сараптама модулі арқылы 96 нысан қамтылып, 57 мыңнан астам малға сараптама жүргізіліп, 38 мыңнан астам ветеринариялық анықтама берілген. Биыл 5 мыңнан астам қаңғыбас ит ауланып, тиісті шаралар қабылданыпты. Мемлекеттік сатып алу тетігі арқылы бұл жұмыстар жүйелі түрде атқарылуда.
Тағы бір айта кетер жағымды іс, – «Фермадан үстелге дейін» қағидаты аясында мал сою орындары жабдықталып, өнімнің сапасы мен қауіпсіздігі қатаң бақылауға алынған. Бұл бағыттағы индикативтік жоспарлар толық орындалып келеді. Қысқасы, облыстағы эпизоотиялық жағдай тұрақты бақылауда.
Десе де аталған салада әлі де шешімін күткен сұрақтар көп. Соңында мал дәрігерлерін оқыту мен қайта даярлау, малдарға екпе егу, мал дәрігерлік пункттердің техникалық-материалдық базасын нығайтуға қатысты сауалдарға спикер тұшымды жауап берді.
Қажет АНДАС
