Жетісу облысының полицейлері Ескелді ауданы аумағында мал ұрлығымен айналысқан күдіктілерді қолға түсірді, – деп хабарлайды 7-su.kz ақпараттық порталы.
Қылмыстық топ бірнеше күн ішінде аудан тұрғындарына миллиондаған теңге шығын келтірген. Алғашқы дерек Ешкіөлмес ауылында тіркелді. 2025 жылғы 9-10 желтоқсанға қараған түні белгісіз тұлғалар жеке үйдің ауласынан 4 бас ұсақ малды ұрлап, иесіне 460 мың теңге материалдық зиян келтірген.
Көп ұзамай Алдабергенов ауылында тағы екі ірі ұрлық орын алды:
-
Түнгі сағат бір шамасында шаруа қожалығынан 10 бас қой қолды болды. Шығын көлемі – 1,5 млн. теңге.
-
13-14 желтоқсан аралығында дәл осы ауылдағы шаруашылық құрылысынан тағы 13 бас мал ұрланды. Бұл жолғы шығын 1 млн. теңгеден асып жығылды.
Жетісу облыстық Полиция департаменті баспасөз қызметінің мәліметінше, жедел іздестіру шаралары барысында екі күдікті анықталды. Олар – Алматы облысының 35 жастағы тұрғыны және Ескелді ауданының 33 жастағы азаматы.
Қазіргі таңда ұсталғандар уақытша ұстау изоляторына қамалды. Тәртіп сақшылары олардың өңірдегі басқа да ұқсас қылмыстарға қатысы бар-жоғын мұқият тексеріп жатыр. Тергеу амалдары жалғасуда.
Мамандар мал иелеріне қора-жайларды мықтап бекітіп, жайылымдағы малды қараусыз қалдырмауға кеңес береді.
