Халыққа мінсіз қызмет көрсетуде бойындағы білім-білігіне ақыл-парасаты сай мемлекеттік қызметкерге жүктелер жауапкершілік пен талап-тәртіп қашанда жоғары. Бұл тұрғыдан алғанда елге аянбай, адал қызмет етіп, өткен жылы өмірден өткен Жолан Омаровтың қызметтік жолы көпшілікке үлгі-өнеге болғаны айдан анық.
– «Әкім бол – халқыңа жақын бол» деген тәмсілді бойтұмардай ардақтап, жасындай жарқ еткен қысқа ғұмырын халқының, елінің, жерінің гүлденуіне арнаған, мемлекеттік қызметкер қандай болу керектігін көрсеткен Жолан Омаровтың ісі мәңгі есте қалсын, «Жолан жұлдызы» мәңгі жарқырап тұрсын деген ізгі тілекпен биылғы жылы аудан көлемінде тұңғыш рет мемлекеттік жас қызметшілер арасында «Халқымның бағы – өз бағым» атты Жолан Ыбырай- ақынұлы атындағы байқау өткізуді ұйғардық, – дейді аудандық тілдерді дамыту және мәдениет бөлімінің басшысы Фарида Бегенбаева.
Алғаш ұйымдастырылған байқау шарттары бойынша 1-ші кезеңде «Амандасу салтымен» команда құрамы өздерін таныстырып өтсе, екінші кезеңдегі «Ой-дода» тақырыбында Жетісу жерінің інжу-маржандарына қатысты суреттерге толық ақпарат беруде тапқырлық танытулары сыналды. Ал, соңғы үшінші кезеңде «Мемлекеттік қызмет – абыройлы міндет» тақырыбы аясында жұмыста қолданылатын ҚР Заңына және ситуациялық әрекетке қатысты сұраққа жауаптары сараланды.
Бес ауылдық округ, тарқатар болсақ, Гүлдала мен Бесағаш бірігіп, Алатау, Тұздыбастау, Кеңдала ауылдық және Талғар аудандық әкімдіктеріндегі жас мамандар «Алтын қыран», «Бастау», «Кеңдала», «Алатау» және «Талғар» деп топ құрып, аталған шарттар бойынша өзара сынға түсті. Мемлекеттік мекемедегі тәжірибелерін шыңдай түскен жас мамандар тапсырмалардан тосылмады. Кәсіби шеберліктерімен қоса нақтылық пен тапқырлықтарын танытуға тырысты.
Байқауда сынға түскен мемлекеттік қызметкерлердің жауаптарын аудандық қоғамдық кеңестің төрағасы, «Құрмет» орденінің иегері Жұмахан Еңкебаев, аудан әкімінің орынбасары Ахмет Ашимахұнұлы, аудандық ардагерлер кеңесінің төрағасы Матан Рахымбердіұлы, ақын-сазгер, «Білім саласының үздігі» төсбелгісінің иегері Камнұр Тәлімұлы және облыстық мәслихат депутаты Сұлтан Нұрдәулетов саралап, жеңімпаздарды анықтауда әділқазылық етті.
– Бірталай әкімдермен қызмет еттім, бірақ, көңілдеріне келмесін, Жолан Ыбырайақынұлының бойындағы өткірлігі, бірсөзділігі, турашылдығы және халыққа жанашырлығы бәрінен биіктетіп тұрары анық. Сол себепті, Жолан айтқандай, «Халқының бағын өз бағына» балап, елге адал еңбек ете білген жастардың шығар биіктері, алар асулары алда деп ойлаймын. Алғашқы байқау болғандықтан кемшін тұстары жоқ емес, бастысы, жас мамандар өз міндеттерін түсінетіндіктерін, мемлекеттік қызметкер деген атқа лайық екендіктерін таныта алды, – деген әділқазылар мүшесі Жұмахан Еңкебаев байқау қорытындысы бойынша бірінші орынды атына заты сай болған «Алтын қыран» командасы, екінші орынды «Талғар», үшінші орынды «Кеңдала» командасы иеленгенін жария етті.
– Бесағаш ауылдық округі әкімінің бас маманы болып еңбек етіп келе жатқаныма екі жарым жылға жуықтады. Қиындығы мен қызығы қатар жүреді. Мемлекеттік қызметші, ең алдымен, жұмысқа жауапкершілікпен қарап, жұмыс уақытын тиімді пайдалану керек. Қандай жағдайда да әдептілік, ұстамдылық танытсақ ұтарымыз көп болмақ. Өз міндетін адал, таза атқарған адамның абыройы да асқар таудай биік болады, – дейді байқау жеңімпазы Фариза Мамырхан.
Ауданда алғаш ұйымдастырылған мемлекеттік қызметшілер арасындағы бұл байқауды келешекте облыстық, тіпті, республикалық деңгейге көтеру көзделгендігін тілге тиек еткен аудан әкімінің орынбасары Ахмет Ашимахұнұлы жас мамандарды ынталандыруда, жігерлендіруде байқаудың алар орны айрықша екенін атап өтті.
Ұлбосын ИСАБЕК
