Облыс аумағында тіршілік ететін кенелер энцефалит вирусын тасымалдаушы зиянкес қатарына жатады. Былтырғы эпидкезеңде 549 кене шағу дерегі тіркелген. Кене энцефалитімен сырқаттану болған жоқ.
Зардап шеккен адамның қан сарысуын, кенені санитариялық-эпидемиологиялық сараптама орталығының аса қауіпті аурулар зертханасына ақылы түрде өткізуге болады. Жәндік шаққаннан кейін 7-14 күн аралығында кене энцефалиті ауруының клиникалық белгілері байқалады. Қатты бас ауру, дене қызуының көтерілуі, қалтырау, құсу, лоқсу, аяқ-қол бұлшық еттерінің әлсіздігі зиянкес шаққандықтың белгісі болуы мүмкін.
Көктем шығысымен табиғат аясына, саяжайға, сауықтыру орталықтарына демалысқа шыққанда жәндіктердің шағуынан сақтанған жөн. Ол үшін дененің барлық бөлігін жауып тұратын ашық түсті киім киіп, репелленттерді қолданған жөн. Кене кірмеу үшін шалбардың балағын етіктің қонышына салады. Әрбір екі сағат сайын шешініп, қағып-сілкіп, тазаланған дұрыс. Егер денеде кене жабысып тұрса оған өсімдік майын құйып, қысқышпен немесе мықты жіппен жұлып алу керек. Жәндік шаққан орынды спирт, иод ерітіндісімен сүртіп, сол жерден алынған сарысуды санитарлық-эпидемиологиялық сараптама орталығының паразитологиялық зертханасына апарып, сараптамадан өткізген жөн. Вирустың бар-жоғын тексерту қауіп-қатердің алдын алады. Сондай-ақ, кене шаққаннан кейін 3 күн ішінде кене энцефалитіне қарсы иммуноглобин еккізіп, невропатологқа қаралған жөн.
Салтанат Байділдінова,
облыстық санитарлық-эпидемиологиялық
бақылау департаменті инфекциялық және паразиттік ауруларды эпидемиологиялық бақылау бөлімінің
жетекші маманы
