Коронавирусқа байланысты елімізде төтенше жағдай енгізіліп, жаппай алдын алу шаралары жүргізілуде. Осыған орай Талдықорған қаласындағы қоғамдық көліктердің тазалануын бақылап, мән-жайды анықтадық.
Барлық бағыттағы автобустар күніне екі рет залалсыздандырылады. Бірінші кезеңде соңғы аялдама пункттерінде бактерияларды өлтіру үшін құрамында хлоры бар ерітіндімен автобус ішін сүртіп шығады. Екінші кезеңде жұмыс уақыты аяқталғаннан кейін көліктің еденінен бастап, іші-сырты толық тазаланады.
– Өздеріңіз көріп тұрғандай, дәл қазір №8 бағыттағы автобусты тазалап жатырмыз. Адам қолы тиетін жерлер, яғни, шынтақшаларды, есік тұтқаларын, орындықтар дезинфекциялануда, – деді Талдықорған қаласы жолаушылар көлігі және автомобиль жолдары бөлімінің бас маманы Нұрбақыт Алтынбеков.
Дезинфекциялық ерітінді аллергия тудырмайды және ешқандай иіс шығармайды. Мамандар жолаушылар мен жүргізушілерден гигиена мен сақтық шараларын күшейтуді сұрауда. Сондықтан адам көп шоғырланған жерлерге бармай, қорқыныш тудырмай, сақтанған жөн.
Күн сайын залалсыздандырады
Облыс орталығында тұрғындардың қауіпсіздігін қамтамасыз ету үшін жаппай дезинфекциялау жұмыстары жүргізілуде. Әсіресе, адам көп жүретін орындардың тазалығы басты назарға алынған.
Залалсыздандыру жұмыстарын «Талдықорған Көркейту» ЖШС атқаруда. Мекеме басшысы Владимир Қауысбековтың айтуынша адам көп жүретін жерлер күніне екі рет, аз жүретін орындар бір рет тазаланады. Натрий гипохлориді қосылған сұйықтықты сыйымдылығы 1,8 тонналық техниканың көмегімен шашуда.
– Қала аумағындағы алаңдар, жаяулар жолы және аялдамаларды күн сайын дезинфекциялаудамыз. Химиялық қоспа жеткілікті. Келісімшарт арқылы Қаскелең қаласынан күнделікті бір тонна жеткізіліп тұрады, – деді Владимир Оңалбайұлы.
Бактерияларды жоюға жұмылдырылған жаңа техника Талдықорған қаласына былтыр келді. Ерекшелігі сол, көлік сыймайтын, тар жерлерге арнайы құрылғы арқылы шашуға болады. Уақытты үнемдеу үшін ерітінді таусылған жағдайда су таситын көлік еселеп отырады.
Мәулен ӘНЕРБАЙ
