«Алматы облысының кәсіподақтар орталығы» аумақтық кәсіподақтар бірлестігінің ұйымдастыруымен Мемлекет басшысы Қасым-Жомарт ТОҚАЕВТЫҢ «Сындарлы қоғамдық диалог – Қазақстанның тұрақтылығы мен өркендеуінің негізі» атты Қазақстан халқына Жолдауы Үйлестіру кеңесінде талқыланды.
Шарада Қазақстан Республикасы Кәсіподақтар федерациясы төрағасының орынбасары Ержан Егембердиев сөз алып, Жолдаудағы көптің көңілінен шыққан мәселелерге тоқталды. Ержан Ошақбайұлы Мемлекет басшысының халықпен тиімді кері байланыс орнату жайлы ауыл-қала халқының жүрек түкпірінде жатқан ойын қос қолдап құптайтынын айтты. Қазақстан Республикасы Президентінің: «Қоғамдық диалог, ашықтық, адамдардың мұң-мұқтажына жедел назар аудару мемлекеттік органдар қызметінің негізгі басымдықтары саналады. Көп жағдайда азаматтарымыз орталық және жергілікті органдар басшыларының құлықсыздығы мен «бейқамдығына» байланысты Президентке жүгінуге мәжбүр болады» деген сөзінен үзінді келтірді. Шындығында халықтың арыз-шағымы, мұң-мұқтажы уақытында назарға алынбағандықтан мәселе күрделеніп кетіп жатады. Ержан Егембердиев Президент Әкімшілігінде азаматтардан келіп түскен өтініштерді мемлекеттік органдардың сапалы қарауын қадағалап, жедел шаралар қабылдайтын бөлімнің құрылғандығы көптеген өзекті мәселенің уақытында шешілуіне негіз болатынына тоқталды. Сондай-ақ, кәсіподақтар бірлестігі отырысында қоғамның жегіқұрты – жемқорлыққа байланысты ой айтылып, сыбайластықтың жолын кесудің күшейетіні сөз болды. Жіп ұшынан жалғасқан жемқорлықпен күрестің алдағы уақытта күн тәртібінен түспейтіндігі құптайтын-ақ мәселе. Орталық және жергілікті органдардың нормативтік-құқықтық актілеріне сыбайлас жемқорлыққа қарсы сараптама жүргізу, бұған сарапшылар мен қоғам өкілдерінің де атсалысуы керектігі жайлы тапсырма елдің ойын дәп басты. Сыбайлас жемқорлыққа қатысты қылмыс жасалған мекеменің бірінші басшысының жауапкершілігі заңнамалық және нормативтік тұрғыдан нақты белгіленетіндігі көңілге қонды. Қазақстанда тұратын әр азамат Ата Заңға сәйкес өз ойын еркін айтуға құқылы.
Жиында «Алматы облыстық кәсіподақтар орталығы» аумақтық кәсіподақтар бірлестігінің төрағасы Әсет Қыдырманов та сөз алып, бейбіт акциялар, яғни митингілер өткізудің тәртібі белгіленгені жөнінде өз ойымен бөлісті. Бейбіт акциялар заңның шеңберінен шықпайтын және азаматтарымыздың тыныштығын бұзбайтын болса жиынды өткізу үшін арнайы орын бөлінеді. Бұл орайда, Мемлекет басшысы бейбіт акция елді мекен шетінде емес, орталықта өткізілуі тиіс екендігін айтты. Бірақ, заңға қайшы және бұзақылық әрекеттерге шақыратын үндеулерге заң шеңберінде тосқауыл қойылады. Тұрғындардың қауіпсіздігі үшін әр шара заң шеңберінен аспағаны дұрыс.
Үйлестіру кеңесінде бірнеше адам Жолдау жайлы өз ойымен бөлісті. Кеңес соңында ҚР Президенті жанындағы Мемлекеттік басқару академиясының Алматы облысы бойынша филиалының директоры Қазбек Данағұлұлымен бірлесіп жұмыс істеу үшін меморандумға қол қойылды.
Гүлжан ТҰРСЫН
