Әр істің қиюын келтіріп, түрлі салада кәсібін жүргізіп отырған жандар қазір аз емес. Қанат жайған бұл үрдіс тек қалада емес, ауыл-аймақтарда да жалғасуда.
Кәсіпкерлікті өркендетуге қыз-келіншектер де белсенділік танытып жүр. Соның бірі Кеген ауылының тұрғыны Эльмира Оңғарбекова. Кәсіпкер келіншектің қолынан келмейтін ісі жоқ. Қай саланы болсын тез меңгеріп, ұршықша иіріп әкетеді. Өз ісін сүйетін сегіз қырлы, бір сырлы жан қыз-келіншектерді 8 НАУРЫЗ мерекесімен құттықтап, жылы лебізін білдірді.
– Жерді жылылыққа орап, жүректерге іңкәр сезім сыйлап көктем келді. Дәл осы кезде Жер-ананың тоңы жібіп бусанып, тіршілік әлемі құлпыра түседі. Күн сәулесі нұрланып, жадырай шуақ шашады. Тамылжыған сәтпен бірге қыз-келіншектер де сұлуланып, шаттыққа бөленеді. Көктемнің алғашқы күндерінде-ақ дүние дидары нәзік жандылардың көңіліне ауады. Өйткені, бұл күндері қыз-келіншектердің 8 наурыз мерекесі тойланады. Сондықтан болар, бұл күнді ақ шашты қариядан бастап, жас жеткіншектерге дейін асыға күтеді. Ерекше мейрамды ер-азаматтар да назардан тыс қалдырған емес. Сондықтан біз де аналарымыз бен әпкелерімізге, жеңгелеріміз бен сіңлілерімізге өмірдегі бар жақсылықты тілеп, оларға ең бірінші әйел бақыты мен көтеріңкі көңіл-күй және мықты денсаулық тілейміз. Барлық Ананың отбасында тек мол береке мен бақыт, шаттық пен сәттілік болсын! Табиғаттың тамаша мерзімі көктемдей құлпыра жасарып, ер-азаматтардың сыйластығы мен құрметіне бөлене беріңіздер демекпін, – дейді Эльмира Оңғарбекова.
Кәсіпкер келіншек өмірлік серігі Бақтияр Өмірбеков екеуі үш ұл, бір қыз тәрбиелеп отырған үлгілі отбасылардың бірі. Спортты да жаны сүйеді. Өйткені, ол волейболдан Кегендегі қыздар «Динамо» командасының алғыр ойыншысы.
Айгүл БАЙЖҰМАҚЫЗЫ
Кеген ауылы,
Райымбек ауданы
