Дана халқымыз талай қиын-қыстау кезеңдерді бастан өткерсе де еркіндікке деген сенімін ешқашан жоғалтқан емес. Сол арман 1991 жылы жүзеге асып, Қазақстан өз тәуелсіздігін жариялап, әлем картасында дербес мемлекет ретінде танылып, еркін ел атанды. Ал 1995 жылы қабылданған Қазақстан Республикасының Конституциясы тәуелсіздігімізді заң жүзінде бекітіп, мемлекетіміздің демократиялық, зайырлы және құқықтық екенін айқындады. Тәуелсіздікті баянды етіп, ел өмірінің берік негізін қалаған басты құжат әрбір азаматтың құқықтары мен бостандықтарын қорғап, елдегі тыныштық пен тұрақтылықтың кепіліне айналды. Бұл күн – халқымыздың тарихындағы ең жарқын әрі мағыналы күндердің бірі. Бүгінде көк байрағымыз биікке көтеріліп, Гимніміз шырқалып, Елтаңбамыз мақтанышпен таныстырылуда. Бұл – әрбір қазақстандықтың жүрегіне қуаныш пен жауапкершілік ұялататын құндылықтар. Тәуелсіздік бізге ата-бабаларымыздың жанқияр ерлігі мен табандылығының арқасында келді.
Тәуелсіздік жылдары Қазақстан саяси, экономикалық және мәдени тұрғыда үлкен жетістіктерге жетті. Егемен ел ретінде халықаралық аренада беделіміз артып, көптеген мемлекетпен ынтымақтастық орнаттық. Ана тіліміз – қазақ тілі мемлекеттік мәртебеге ие болып, ұлттық мәдениетіміз бен рухани құндылықтарымыз жаңғыра түсті. Тәуелсіздік – тек өткеннің жемісі емес, болашақ алдындағы үлкен жауапкершілік. Оны сақтау, нығайту – бәріміздің қасиетті парызымыз. Білімді, еңбекқор, отаншыл ұрпақ қана ел тәуелсіздігін мәңгілік ете алады.
Тәуелсіздік – біздің мақтанышымыз, баға жетпес байлығымыз. Оны қадірлеу, қорғау және келер ұрпаққа аманат ету – баршамыздың ортақ міндетіміз екенін естен шығармайық.
Ерасыл СЕИТҰЛЫ
Жетісу облыстық атқарушылық округінің жеке сот орындаушысы
