Қасым-Жомарт Тоқаевқа елдегі криминогендік ахуал, ішкі істер органдарына жүктелген міндеттердің орындалуы және «Заң және тәртіп» қағидатын орнықтыру бойынша атқарылып жатқан жұмыстар жөнінде баяндалды.
Ішкі істер министрі Ержан Сәденовтің айтуынша, биылғы 10 айда елдегі қылмыс саны 5,3 мыңға азайған. Қылмыстың ізін суытпай ашу көрсеткіші де жақсарған. Отбасылық-тұрмыстық құқықбұзушылықтармен күрес күшейіп, алдын алу шараларының нәтижесінде тұрмыстық сипаттағы қылмыс 8 пайызға, оның ішінде адам өліміне әкелетін фактілер 26 пайызға төмендеді.
Іздеуде жүрген 1 391 адам ұсталды, олардың 138-і шетелде қолға түсті. Жедел іс-шаралар барысында 30 тоннадан астам есірткі, оның ішінде бір тоннадан астам синтетикалық заттың таралуына жол берілмеді. Ұйымдасқан қылмысқа қарсы іс-қимыл нәтижесінде ауыр және аса ауыр қылмысқа қатысы бар 185 қылмыстық топ анықталып, әрекеті тоқтатылды.
Интернет-алаяқтықпен күрес аясында 12 колл-орталық жойылды (жетеуі шетелде). Шамамен 83 миллион фрод-қоңырау мен 4 мың алаяқтық сайт бұғатталды. Алаяқтардың 2,3 миллиард теңгені елден шығаруының алдын алу мүмкін болды.
Жол қауіпсіздігі саласында цифрлық бақылау құралдары енгізілуде. Дрондар арқылы 6 мыңнан астам, орташа жылдамдықты өлшеу жүйелері арқылы 190 мыңнан астам жол ережесін бұзу дерегі тіркелді. Соның нәтижесінде жол-көлік оқиғаларынан болатын өлім-жітім 9,4 пайызға, мас күйінде көлік басқарудан туындайтын қайғылы жағдайлар 24 пайызға азайды.
Egov mobile және банктердің қосымшаларына енгізілген «Заң және тәртіп» сервисі іске қосылғалы бері азаматтардан 32 мыңнан астам өтініш қабылданды. Сонымен бірге экстремизмге қарсы іс-қимыл және көші-қонды бақылау шаралары туралы ақпарат ұсынылды.
Президент елдегі құқықтық тәртіп пен қоғамдық қауіпсіздік деңгейін арттыруға бағытталған бірқатар нақты тапсырма берді.
