«Nur Otan» партиясы Талдықорған қалалық филиалында Қазақстан Республикасы Тәуелсіздігінің 30 жылдығына арналып салтанатты жиын өтті. Онда экология, геология және табиғи ресурстар саласының қызметкерлері марапатталды.
Құттықтау сөз алған «Қазсушар» РМК Алматы филиалының директоры Саят Құдайбергенов: «Барлықтарыңызды мерекемен шын жүректен құттықтаймын! Бүгін – ұлық күн. Тәуелсіздік оңайлықпен келмеді. Жастар 1986 жылы жаппай алаңға шығып, елдігімізді көрсетті. Азаттыққа солардың арқасында қол жеткіздік. Қайрат, Ербол, Ләззат сынды ержүрек ұл-қыздарымызды ұмытпауымыз керек», – деп өзі басшылық ететін мекемеде 800-дей қызметкер бар екенін айтты.
Мерекелік жиынға пандемияға байланысты саралап, еңбегімен еленгендер ғана шақырылды. Салтанатты шарада елі мен жері үшін аянбай еңбек еткен қызметкерлер ҚР Экология, геология және табиғи ресурстар министрінің Құрмет грамотасын, министрліктің Су ресурстары комитеті төрағасының Алғыс хатын иеленді. Сонымен қатар бірқатар азамат «Ерен еңбегі үшін» медалі, І, ІІ дәрежелі Еңбек даңқы төсбелгісімен марапатталды. Бұдан бөлек «Қазсушар» РМК Алматы филиалының директоры мен Талдықорған қаласы әкімінің Құрмет грамотасы, Алғыс хаты табысталды.
Мәулен ӘНЕРБАЙ
