Тұңғыш Президент – Елбасы Н. Назарбаевтың Жарлығымен қайта қалпына келген Райымбек ауданына 3 жылдан асты. Ауданның орталығы Нарынқол ауылы шын мәнінде жаңарып, жайнады. Әлеуметтік нысандар салынып, жүзден аса тұрғын үй бой көтерді. Дәл қазіргі уақытта аудан орталығында мұрағат ғимаратының құрылысы жүргізіліп жатыр.
Аудандық халыққа қызмет көрсету орталығы ғимаратының жанынан салынып, мұрағат құрылысын «Энерго Строй Проект» ЖШС-нің құрылысшылары қолға алған. Жұмыс былтыр басталыпты. Қараша айына дейін бітіру жоспарланып отыр. Үстіміздегі жылғы екінші тоқсанда 123 миллион теңге қаражат бөлінді. Қазір ғимараттың екінші қабатында құрастыру, арматура тоқу жұмыстары жүргізіліп жатыр.
– Жағдайымыз жаман емес. Құрылысқа қажетті материал жеткілікті. Мұрағат құрылысымен 15 адам айналысуда. Белгіленген уақытта бітіруге мүмкіндігіміз мол, – дейді учаске бастығы Бейбіт Құсайынов.
Аудан орталығында бұдан бөлек 50 тұрғын үйдің жұмыстары бітуге жақын. Үйлердің сырты қоршалып, түзету жұмыстары қолға алынған.
Қ. САТЫПАЛДЫ
Нарынқол ауылы
