Әр сайына жыр қонақтап, әр бұтасына өлең ұялаған қасиетті Жетісу жерінде өмірі өнермен, өлеңмен астасқан дара дарындар аз емес. Қазақстан Жазушылар одағының мүшесі болып табылатын арқалы ақын, Қазақстанның Құрметті журналисі, ҚР Мәдениет қайраткері, Қаратал және Көксу аудандарының Құрметті азаматы Әміре Әрін сондай тарлан таланттардың қатарында.
Журналистік қарбалас қызметінен қолы қалт еткенде шабыт тұлпарына мініп, өлең өлкесіне өзіндік жолын салған қаламгер осы уақытқа дейін «Тамызық», «Маздақ» атты өлеңдер жинағын жарыққа шығарып, жырсүйер қауымға дарынды ақын ретінде танылды. Өлеңдері облыстық, республикалық деңгейлерде өткен жыр мүшәйраларында әлденеше рет топ жарып, республика деңгейінде жарық көрген бірнеше жыр жинақтарына енгізілді. Әр жылдары «Тылсым тыныс» атты деректі повесі мен «Кенен жерім – Көксуым» деп аталатын публицистикалық шығармалар жинағы, «Ауғанның от-жалыны» атты зерттеу кітабы, «Томирис» әңгімелер жинағы жарық көрді.
Әміре Әрінұлы бас редакторы болып табылатын облыстық «Жетісу» газеті әдебиет саласындағы жылт еткен жақсы жаңалықтарды оқырманға жеткізуге асығып, қаламгерлердің шығармашылығын жүйелі насихаттап тұрады. Басылымда жерұйық мекенде дүниеге келген ақын-жазушылардың өлең, әңгімелері де жиі жарияланады.
Күні кеше ғана талантты әріптесіміз, білікті басшымыз ӘРІН Әміре Әрінұлына осындай жетістіктері үшін Қазақстан Жазушылар одағы басқармасы Секретариатының шешімімен Халықаралық «Алаш» әдеби сыйлығының берілгендігі белгілі болды.
Белгілі ақын-жазушылардың, сонымен бірге әдебиетімізге жанашырлық, қолдау танытып жүрген Өзбекстан, Азербайжан, Белорус Республикалары қаламгерлерінің қатарында жоғары марапатқа ие болған қадірлі әріптесіміз Әміре Әрінұлын Халықаралық «Алаш» әдеби сыйлығын алуымен шын жүректен құттықтаймыз! Шығармашылық саласындағы алар асуларыңыз дәйім биіктей берсін дегіміз келеді.
Ізгі тілекпен: «ЖЕТІСУЛЫҚТАР».
