Қазақстан Республикасының Оқу- ағарту министрлігінің ұйымдастыруымен өткен «Үздік педагог» байқауына бір жарым мыңға жуық педагог қатысқан. Солардың ішінен финалдық кезеңге 174 мұғалім ғана өтіп, олардың арасында 64 үздік ұстаз марапатталды. Республикалық байқауда жерлесіміз оза шапты. 1999 жылы Жетісу мемлекеттік университетін тамамдаған Камшат Макеева педагогикалық бағытта табанды еңбек етіп келеді. Ол Сарқан ауданындағы Черкасск орта мектебінен бастап, гуманитарлық-экономикалық колледжде қызмет атқарған. Қазіргі таңда ол «Zhansugurov College» қабырғасында жас ұрпаққа ана тілінде сабақ беруде.
Облыстан үздік атанып, республикалық додаға жолдама алған Камшат байқаудың шешуші кезеңінде «Абай Құнанбайұлының «Масғұт» поэмасы» тақырыбында ашық сабақ өткізіп, өз білімін, әдістемелік машығын көрсетеді. Оның өткізген сабағын қазылар алқасы жоғары бағалады.
– Байқау шарттары бойынша күнтізбелік-тақырыптық жоспарға сәйкес сабақ өткізу міндеттелді. 30 жылға жуық білім саласында сабақ өткізіп жүрсем де басында аздаған қобалжу болды. Әділқазылардың шынайы бағалауының арқасында жеңіске жеттім десем қателеспеймін. Маған сенім артқан әріптестеріме және басшылыққа алғыс айтамын, – дейді ол.
Камшат Макеева қазақ тілі мен әдебиеті бойынша бірнеше оқу құралдарының авторы. Алдағы уақытта республикалық оқу-әдістемелік кеңесі мақұлдаған жаңа авторлық бағдарламасы жарық көрмек. Сонымен қатар, ол колледждегі «Болашақ» пікірсайыс клубының жетекшісі ретінде студенттердің логикалық ойлау мен шешендік қабілетін дамытуға ерекше көңіл бөледі. Клуб мүшелері облыстық және республикалық деңгейдегі пікірсайыс жарыстарында жүлделі орындар алып жүр.
Медет ЖҰМАБАЙ
