ҚР Парламенті Мәжілісінде Премьер-министр Олжас Бектенов пен Үкімет мүшелерінің қатысуымен өткен пленарлық отырыста 2026–2028 жылдарға арналған республикалық бюджет және жалпы сипаттағы трансферттер көлемі туралы заң жобалары талқыланды, – деп хабарлайды 7-su.kz ақпараттық порталы.
Депутаттар Үкімет мүшелеріне сұрақтар қойып, алдағы үш жылда экономиканы дамыту бағытында қандай шаралар жүзеге асырылатынын сұрады.
Премьер-министрдің айтуынша, ел экономикасы соңғы жылдары тұрақты өсім көрсетуде.
– Соңғы үш жылда экономикалық өсім тұрақты сақталуда. 2023 жылы 5,1%, ал былтыр 5% өсімге қол жеткіздік. Биыл да қарқын жоғары. Әлемдік экономикадағы орташа өсім 3% болса, бұл – біз үшін оң нәтиже. Үкімет тұрақты әрі қарқынды өсімді қамтамасыз ету үшін барлық күш-жігерін жұмсап отыр, – деді Олжас Бектенов.
Оның сөзінше, «Бәйтерек» холдингі арқылы жалпы көлемі 8 трлн теңге болатын ірі бағдарлама іске асырылып жатыр. Бұл бастама инфрақұрылымдық және индустриялық жобаларды дамытуға бағытталған.
– Биыл 190 индустриялық жоба жүзеге асырылады. Олардың жалпы құны 1,5 трлн теңгеден асады. Қазір 1681 ірі жоба қолға алынған, бұл 40 мыңға жуық жаңа жұмыс орнын ашуға мүмкіндік береді, – деді Премьер-министр.
Сонымен қатар, Үкімет макроэкономикалық тұрақтылықты сақтау мен инфляцияны төмендетуге басымдық беріп отыр.
– Қыркүйек айының қорытындысы бойынша инфляция 12,9%-ды құрады. Бұл – жоғары көрсеткіш. Сондықтан Ұлттық банкпен бірлесіп, оны төмендету жөнінде нақты шаралар жоспары әзірленіп жатыр. Жоспар дайын болған соң жарияланады, – деп атап өтті Бектенов.
