Радиоэлектроника және байланыс әскери-инженерлік институты «Әкем, анам және мен – спорттық отбасы» атты отбасылық сайыс ұйымдастырды. Спартакиадаға 6 отбасы қатысты.
Жарыстың ашылу салтанатында сөз алған Радиоэлектроника және байланыс әскери-инженерлік институтының бастығы, генерал-майор Асқар Мұстабеков:
– Шараның мақсаты – салауатты өмір салтын қалыптастыру, көңілді спорт ойындары арқылы жас әскери қызметшілердің, олардың отбасы мүшелерінің спортқа деген белсенділігін нығайту болып табылады. Отбасындағы береке-бірлік, татулық пен сыйластық Отанымыздың кемелденіп өсуіне ықпал етеді. Сондықтан, әскери қызметшілердің өз отбасымен кедергілерден бірге өтіп, жұмылған жұдырықтай тату да берік болулары үшін осы спорттық сайысты ұйымдастырдық, – деп барлық қатысушыларға сәттілік тіледі.
Әр топтың құрамы 4 сайыскерден: әкесі, анасы және 2 баласынан тұрды. Әр сынақта олар өздерінің икемділігін, мықтылығын, жылдамдығы мен топтасу арқылы жұмыс істей білу қабілеттерін көрсетті. Сайыс эстафета түрінде өтті. Әр отбасы доппен кедергілер арқылы жүгіру, қаппен секіру, допты алып жүгіру және арқан тарту сияқты кедергілерде өзара сынға түсті.
Сайыс қорытындысы бойынша 1-орынды Айдарбековтер отбасы иеленді. Сыздықбаевтар отбасы 2-орынды еншілесе, Бірімбердиевтер отбасы 3-орынды қанжығалады. Сондай-ақ, отбасылар «Белсенді отбасы», «Мейірлі отбасы» және «Көңілді отбасы» номинациялары бойынша марапатталды. Жарыс жеңімпаздары мен жүлдегерлеріне диплом мен медальдар және арнайы сыйлықтар табыс етілді.
РЭжБӘИИ баспасөз қызметі
