ҚР Президентінің кеңесшісі Мәлік Отарбаев Жетісу облысына іссапары барысында Талдықорғандағы бірқатар мекемелерді аралап, олардың бүгінгі жай-күйімен танысты. Белсенді ұзақ өмір сүру орталығының ардагерлерімен кездесіп, «Әдеп – құқық жұмысы жөніндегі ментор» жобасы аясында №27 орта мектеп-гимназиясының оқушыларына дәріс өтті.
Мәлік Нұржанұлы ең алдымен ардагерлерге арналған орталыққа бас сұқты. Ондағы шахмат, дойбы, үстел теннисі ойындарын, йога сабағын, қазақ тілі, тоқу және тігін курстарын, жаттығу залын көріп қариялармен пікірлесті. Сонымен қатар вокалмен айналысатын зейнеткерлердің өнерін тамашалап, мемлекет басшысы Қасым-Жомарт Тоқаевтың сәлемін жеткізді. Президент кеңесшісі өз сөзінде судан зардап шеккен өңірлерге қол ұшын созып көмегін тигізген жетісулықтарға алғыс айтып, кездесуге қатысушыларға зор денсаулық, ұзақ өмір, сәттілік тіледі.
Содан кейін шаһардағы №27 орта мектеп-гимназиясының оқушыларымен жолыққан Мәлік Отарбаев білімгерлерге «Әдеп – құқық жұмысы жөніндегі ментор» жобасы аясында дәріс оқыды. Ол жеткіншектерге ең бірінші мақсат мансап қуу емес, толыққанды адам болу керек екенін айтып, өз өмір жолынан сыр шертті. Белгілі бір биікке жету үшін кітап оқу керектігін, көркем әдебиеттің адамға берер пайдасы мол болатындығын ұғындырыды. Мәлік Нұржанұлы оқушыларды әлемдік, Ұлттық әдебиеттерді, сондай-ақ, ҚР Президенті Қасым-Жомарт Тоқаевтың «Свет и Тень» кітабын оқуға шақырды. Оның айтуынша, бұл адамның жүрегін тазартатын, оған өмірдегі қиындықтарды жеңуге күш беретін, үмітті нығайтатын және мақсатқа жетуге ынталандыратын шығарма.
ҚР Президентінің кеңесшісі Мәлік Отарбаев «Жетісу жастары» КММ ғимаратында еріктілер мен менторлардың, it HUB қызметімен танысты. Ондағы мамандардың істеп жатқан істерінің орасан екенін, еріктілердің су тасқынынан зардап шеккен отбасыларға гуманитарлық көмек көрсетуде аянып қалып жатпағанынан хабардар екенін айтып өтті.
Меруерт Дәуренқызы,
ЖУ студенті
