Қазақстан Президенті Қасым-Жомарт Тоқаев Ресей Президенті Владимир Путинмен телефон арқылы сөйлесті, деп хабарлайды 7-su.kz ақпараттық порталы.
Әңгіме барысында Мемлекет басшысы әріптесін АҚШ Президенті Дональд Трамппен Анкориджде өткен кездесу қорытындысымен құттықтады. Тоқаевтың айтуынша, келіссөздер Ресейдің Украина жөніндегі ұстанымын америкалық тараптың жақсырақ түсінуіне ықпал етіп, күрделі мәселенің шешімін іздеуде ортақ тіл табуға мүмкіндік береді.
Қасым-Жомарт Тоқаев Аляскадағы саммитті Ресейдің халықаралық позициясын және әлемдік аренадағы өзара түсіністікті нығайту тұрғысынан маңызды оқиға деп бағалады. Ол сапардың сәтті ұйымдастырылғанын атап өтіп, қазіргі жағдайда оның саяси маңызы зор екенін айтты.
Өз кезегінде Владимир Путин Тоқаевқа Аляскада өткен келіссөздің кейбір нақты аспектілері туралы ақпарат берді.
Сұхбат соңында Қазақстан Президенті Ресей Президентіне энергетика саласындағы конструктивті ынтымақтастық үшін алғыс білдірді.
