Арасандықтар тынығушыларға сүт, айран, қымыз саудалайтын. Әр шаңырақтағы 2-3 сиыр бір отбасын асырайтын. Нәрлі ет, сарайыңды ашар дәмді қымыз келушілердің таңдайынан кетпейтін. Ауылда сол мал әлі де бар. Бірақ, сатып алушылар жоқ. Бүгінде елді мекен тұрғындарының 70 пайызын шетелдерден атамекенге қоныс аударған қандастарымыз құрайды. Олар төрт түлікті өсірудің, өнімін өндірудің шебері екені даусыз. Бірақ, он жылдан аса уақыттан бері сауықтыру мекемесі қаңырап, бос тұр. Қоршаудың ішінде тірі жан, тісті бақа жоқ.
Ғимараттары қирап, аумағы қараусыз қалып, талдары жабайы тоғайға айналып, шипалы суы далаға ағып жатыр. Қазақтың ардақты ұлы Дінмұхамед Қонаев арнайы барып демалатын аңыз демалыс орнының жұмысын тоқтатқаны ауыл жұрты үшін ғана емес, жалпы облыс аумағындағы бір туризм ошағының тұралауы болып тұр. Ал аудан қаншама табыстан құр қалғаны айтпаса да түсінікті. Ауыл тұрғындары жұмыстан айырылды. Содан бері шипажай бірнеше жекеменшік компанияның қолына өтті. Сатып алған серіктестіктер саф ауасы мен зәмзәм суы дертке дәру шипажайдың шаруасын ұқсатпады. Жұмысын жүргізе алмады ма, әлде ниеттері болмады ма, елді нәпақасынан айырды. Бүгінде ауыл халқы бей-берекет ағып жатқан суды қаңылтырмен қоршап, шағын үйшік жасап қойды. Шомылғысы келгендер ішіне кіріп жуына алады. Бірақ, бұл тығырықтан шығу жолы емес. Табиғат байлығы халыққа табыс әкелуі тиіс.
Облыстық «Jetіsý» газетінің журналистері «Қапал-Арасан» шипажайының жайын білмекке өңірді бетке алдық. Бізбен кездесуге Ақсу ауданы әкімінің орынбасары Амандос Сабырбаев пен аудандық қоғамдық даму бөлімінің басшысы Алмат Алмасұлы келді. Амандос Ақышұлы: «Шипажайдың қазіргі иелеріне хат жолдадық. 2021 жылдан бері «Қапал- Арасан» шипажайына «Caspian Offshore Construction Realty» және «Laguna Properties» жауапкершілігі шектеулі серіктестіктері иелік етеді. Олар шипажайды өз қаражаттарына сатып алған. Жақында аудан әкімдігі тарапынан шипажай иелеріне демалыс орнын қалпына келтіру барысындағы жоспарлары, мақсат-мүдделері жайлы сұрақ қойған ресми хат жолдадық. Серіктестіктің директоры К. Воронкова қазіргі уақытта жаңа кешен салу бойынша жобалау жұмыстары, инвестиция тарту мәселелері қаралып жатқанын айтты. Олар экологиялық сауықтыру орталығын ашып, ойын-сауық туризмін дамытпақшы. Аталмыш жауапкершілігі шектеулі серіктестік бүгінде Алатау қаласында ірі инвестициялық жобаны іске асыруда. «Қапал-Арасан»» экологиялық сауықтыру кешенінің жобалық-сметалық құжатын 2026 жылы жасамақшы. Ал құрылыс жұмыстарын бастауды 2027 жылдың басына жоспарлап отыр», – деді. Аудан әкімі орынбасарының аузынан естіген тағы бір жағымды жаңалық – Қапалдағы «Тамшыбұлақтан» экологиялық туристік келу орталығын ашу жайлы жобалық-сметалық құжаттың дайындалғаны. Егер қаражат мәселесі шешілсе «Тамшыбұлақтың» бал дәмі әлі талайды тамсандыратыны анық.
Осындай жан жадыратар жағымды жаңалықты оқырманмен бөлісуді жөн көрдік. Үмітімізді үзбей «Қапал-Арасан» шипажайының ашылуын күтейік. Ол қандай бағытта ашылса да өңір халқының экономикасын арттырып, инфрақұрылымын жақсартып, мәдениетін арттырып, көз қуанышына айналары сөзсіз. Тек айтылған сөз іске аспай қалмасын дейік!
Гүлжан ТҰРСЫН
