Қазақстан Президенті Қасым-Жомарт Тоқаев БҰҰ Бас хатшысы Антониу Гутерришпен кездесу өткізді, – деп хабарлайды 7-SU.KZ. Ақорданың баспасөз қызметіне сілтеме жасап.
Әңгімелесу барысында тараптар Нью-Йоркте өтіп жатқан БҰҰ Бас Ассамблеясының күн тәртібіндегі өзекті мәселелерді талқылады. Қасым-Жомарт Тоқаев Қазақстанның алдағы уақытта да БҰҰ-ға қолдау көрсетіп, бейбітшілік пен тұрақтылықты нығайтуға, орнықты дамуды қамтамасыз етуге белсенді үлес қоса беретінін атап өтті.
Кездесу барысында ерекше назар Алматы қаласында ашылған Орталық Азия мен Ауғанстан үшін БҰҰ-ның Орнықты даму мақсаттары жөніндегі Өңірлік орталығының жұмысына аударылды. Мемлекет басшысы мен Бас хатшы аталған орталықтың қызметін күшейтуге бағытталған меморандумға қол қойды.
Антониу Гутерриш Қазақстанның халықаралық бастамаларына жоғары баға беріп, жаһандық ынтымақтастықты нығайтуға қосқан үлесін ерекше атап өтті. Ол Қазақстанның көпвекторлы сыртқы саясаты мен диалогты ілгерілетуге қосқан еңбегі өңірлік әрі жаһандық қауіпсіздік үшін маңызды екенін жеткізді.
Кездесу соңында тараптар Қазақстан мен БҰҰ арасындағы стратегиялық серіктестікті одан әрі дамытуға уағдаласты.
