Қазақстан Президенті Қасым-Жомарт Тоқаев екінші «Орталық Азия – Ресей» саммиті аясында аймақ пен Ресей арасындағы экономикалық ынтымақтастықтың өзекті бағыттарына тоқталды, – деп хабарлайды 7-su.kz ақпараттық порталы.
Мемлекет басшысы ең алдымен сауда және индустриялық қарым-қатынасты дамыту мәселесін басым бағыт ретінде атап өтті.
– «Алғашқы саммитте біз экономикалық ынтымақтастықтың жаңа үлгісін қалыптастыру жөнінде келіскен едік. Бүгін қабылданатын Бірлескен іс-қимыл жоспары 50-ден астам нақты шараны қамтиды. Бұл – аса құнды құжат. Сондықтан оны тиімді әрі уақтылы іске асыру маңызды», – деді Қасым-Жомарт Тоқаев.
Сауда айналымы 50 миллиард доллардан асты
Президенттің айтуынша, өткен жылы Орталық Азия елдері мен Ресей арасындағы сауда айналымы 20 пайызға артып, 50 миллиард доллардан асқан. Оның ішінде 28 миллиард доллары Қазақстан мен Ресей арасындағы сауда үлесіне тиесілі.
Сонымен қатар Ресей Қазақстан экономикасына ірі инвестиция құюшы елдердің бірі саналады:
- Жалпы инвестиция көлемі – 26 миллиард доллардан астам;
- 2024 жылы Ресейден Қазақстанға келген тікелей инвестициялар 33% өсіп, 4 миллиард доллардан асқан.
Бұл өсімге ең алдымен өнеркәсіп кооперациясын жедел дамыту ықпал еткен. Қазіргі таңда:
- 114 инвестициялық жоба іске асты (жалпы құны – 21 млрд доллар);
- 33 жоба жүзеге асырылу сатысында (инвестиция көлемі – 4,5 млрд доллардан асады).
Сауда кедергілерін жою мен шекаралық сауданы дамыту
Президент өз сөзінде аймақ елдері мен Ресей арасындағы сауда қарым-қатынасын одан әрі нығайту үшін келесі бағыттарды ұсынды:
Сауда кедергілерін жою,
Өзара сауданы жандандыру,
Тауар айналымының номенклатурасын кеңейту.
Осы мақсатта:
- Шекаралық сауда аймақтарын құру,
- Аймақтық және бизнес-форумдар,
- Көрмелер мен жәрмеңкелер өткізу,
- Электрондық сауда алаңдарын дамыту ұсынылды.
Қасым-Жомарт Тоқаевтың айтуынша, бүгінде Орталық Азияда бірлескен сауда-өнеркәсіп аймақтары мен индустриалдық хабтар қалыптасып келеді. Бұл алаңдар:
- Өндірісті жергілікті жерде дамытуға,
- Қосылған құн тізбегі бойынша кооперация орнатуға,
- Тұрақты логистиканы қамтамасыз етуге мүмкіндік береді.
– «Ресейлік бизнестің бұл жобаларға қатысуы – Ресей тауарларының Қазақстан нарығында ұзақ уақыт бойы сақталуына және айналымда болуына ықпал етеді», – деді Мемлекет басшысы.
