Мемлекет басшысы Еуропа Одағының Орталық Азия жөніндегі арнайы өкілі Эдуардс Стипрайсты қабылдады, – деп хабарлайды 7-su.kz ақпараттық порталы.
Қасым-Жомарт Тоқаев мәртебелі мейманмен кездесуде Қазақстан үшін негізгі әрі сенімді серіктестердің бірі саналатын Еуропа Одағымен көпжоспарлы ынтымақтастықты тереңдетудің маңызын атап өтті.
Президент 10 жыл бұрын қабылданған кеңейтілген серіктестік пен ынтымақтастық туралы келісім екі тарап арасындағы қарым-қатынастың маңызды кезеңіне айналғанын айтты. Сонымен қатар, Орталық Азия мемлекеттері мен ЕО арасындағы белсенді және конструктивті диалогқа жоғары баға берді.
Өз кезегінде Эдуардс Стипрайс Еуропа Одағы Қазақстанмен ынтымақтастықты одан әрі кеңейтуге ниетті екенін жеткізіп, екіжақты және өңірлік деңгейдегі өзара іс-қимыл қарқыны арта беретініне сенім білдірді.
