Алматы облысында Қазақстандағы алғашқы атом электр станциясының (АЭС) құрылысы ресми түрде басталды. Бүгін энергетика министрінің қатысуымен капсула салу рәсімі өтті, хабарлайды Tengrinews.kz.
Салтанатты шара барысында Атом энергиясы агенттігінің төрағасы Алмасадам Сәтқалиев сөз сөйледі.
«Жобаны іске асыру Қазақстанға жаңа буын жоғары білікті мамандарын даярлауға, ғылыми-зерттеу базасын нығайтуға, сондай-ақ білім беру мен технологиялық серпіліске жағдай жасауға мүмкіндік береді. АЭС – стратегиялық жоба, ол атом өнеркәсібінің, өңірлік инфрақұрылымның, индустриялық-инновациялық дамудың және ұзақ мерзімді экономикалық өсудің басты қозғаушысына айналады», – деді Алмасадам Сәтқалиев.
Сондай-ақ ол жобаның ауқымды қоғамдық қолдауға ие екенін атап өтті.
«Өткен жылы өткен республикалық референдумда ел халқының 70 пайыздан астамы бұл бастаманы қолдады. Әсіресе Үлкен ауылының мысалы ерекше: тұрғындардың 97 пайызы дауыс беруге қатысып, шамамен 90 пайызы «иә» деп жауап берді. Бұл жобаның мықты қоғамдық мандат алғанын көрсетеді», – деді агенттік басшысы.
Салтанатты жиында «Росатом» мемлекеттік корпорациясының бас директоры Алексей Лихачёв та сөз сөйледі.
«Біз алаңға шығып, қуатты әрі заманауи атом электр станциясын салу бойынша шабыттандыратын жобаны іс жүзінде бастауға кірістік. Қазақстан атом саласында зор тәжірибеге ие және әлемдік атом элитасына кіретін ел – бұл тек уран қорының 40 пайызы осында өндірілетіндіктен ғана емес. 1940-жылдардың соңынан бастап біздің халықтар атом ғылымы мен технологиясы саласында ынтымақтасып келеді. Дәл Қазақстанда алғашқы өнеркәсіптік реактор құрылған болатын», – деп атап өтті «Росатом» басшысы.
Айта кетейік, құрылыс алаңында бұрғылау қондырғылары алғашқы топырақ үлгілерін алады. Бұл үлгілері бар капсула зерттеу үшін ресейлік тарапқа беріледі.
Рәсімге шенеуніктер, қазақстандық және ресейлік БАҚ өкілдері, сондай-ақ АЭС салынатын Үлкен ауылының тұрғындары қатысты.
