Энергетика вице-министрі Сұңғат Есімханов Үкімет отырысында алдағы уақытта көмір бағасының, соның ішінде әлеуметтік көмірдің өсу ықтималдығына қатысты түсініктеме берді, деп хабарлайды 7-su.kz ақпараттық порталы.
Оның айтуынша, қазіргі уақытта көмір бағасы өзгермейді.
«Баға осы жылдың 1 қаңтарынан бастап түзетілген болатын. Сондықтан жуық арада қымбаттау жоспарда жоқ. Біз бағаның өсуін күтпейміз», – деді вице-министр.
Сонымен бірге ол көмір құны нарықтағы жағдай мен логистикаға байланысты қалыптасатынын атап өтті.
«Қазір көмір бағасы реттелмейді, ол бәсекелі ортада белгіленеді. Бұл бағытта біз Бәсекелестікті қорғау және дамыту агенттігімен бірлесіп жұмыс істеп жатырмыз. Бағаға жеткізу шығындары мен теміржол тасымалы да әсер етеді. Бұл мәселе жергілікті атқарушы органдармен бірге шешіледі», – деді Сұңғат Есімханов.
Жылыту маусымына әзірлік барысына да тоқталған вице-министр жөндеу жұмыстарының мерзіміне ғана емес, жабдықтардың жалпы жағдайына да назар аударылатынын айтты. Оның сөзінше, кейбір ЖЭО-ларда жөндеу мерзімдері ұзартылғанымен, бұл станциялардың дайын емес екенін білдірмейді.
«Мысалы, бір станцияда 16 қазандық болса, барлығын бірдей қосу міндетті емес. Дегенмен біз барлық жабдықтың толық дайын болуын талап етеміз», – деді ол.
Сонымен қатар Есімханов Риддер мен Кентау қалаларындағы энергия нысандары ерекше бақылауда тұрғанын жеткізді. Соңғы жылдары бөлінген қаржының арқасында бұл аймақтарда қажетті жұмыстардың басым бөлігі атқарылған.
