Жыл басынан бері Қаржы мониторингі агенттігі (ҚМА) 34 блогердің онлайн-ойындарды жарнамалауға қатысы барын анықтады, деп хабарлайды 7-su.kz ақпараттық порталы.
Агенттік мәліметінше, олардың 11-і әкімшілік жауапкершілікке тартылса, қалған 23 контент жасаушыға қатысты материалдар Мәдениет министрлігіне жолданған.
Заңды жүйелі түрде бұзу
ҚМА блогерлердің басым бөлігі заңды бір рет емес, бірнеше рет бұзғанын айтады.
-
Хип-хоп орындаушы Baller (Шыңғысхан Көпбаев) жыл басынан бері бес рет жауапқа тартылған.
-
Ринат Шамшырақ (600 мыңнан астам жазылушысы бар) та онлайн-казино жарнамалағаны үшін әкімшілік іске іліккен.
-
Блогер Niko_nett пен инфлюенсер Қайсар Қамза да ерекше назарға алынды. Қамза телеграм-арнасында жалған жеңімпаздардың видеосын жариялап келген.
-
Наиль Тұрғанов жарнама үшін 8 млн теңге алса,
-
Нұрғазы Тоқтаров («Nakonay Qarapaiym») заңсыз жарнама арқылы 15,8 млн теңге табыс тауып, оның жартысына жуығын сол ойындарға ұтылып қалған.
Әйел блогерлер де бар
Онлайн-казино жарнамасына қыз-келіншектер де тартылған.
-
Мариям Құлжабаева (@oomariko) стористерін небары 350 мың теңгеге бағалап, жазылушыларын тіркелуге шақырған.
-
Сондай-ақ, Зухра Хакиева, Диана Халметова, Әсем Аубакирова, Арина Байкова, Күмісай Айымбетова және тағы басқа блогерлердің аты аталды.
ҚМА шарасы мен жоспары
Агенттік онлайн-казино жарнамасын «тәуелділікке бастайтын негізгі арна» деп атап, блогерлердің әрекеті адамдардың тағдырына, отбасылардың күйреуіне әсер етіп отырғанын мәлімдеді.
Мекеме мұндай әрекеттерді ҚР ҚК-нің 28-бабының 5-тармағы бойынша «заңсыз ойын бизнесіне көмектесу» ретінде қарастыруды жоспарлап отыр. Сонымен қатар, қаржы пирамидаларын жарнамалағандағыдай, қылмыстық жауапкершілік енгізу бастамасы көтерілді.
ҚМА блогерлерге үндеу жасады:
«Жарнама түріндегі контент таратумен айналысатын әрбір тұлға заңды қатаң сақтауы тиіс. Агенттік заңсыз ойындарды насихаттаудан бас тартып, адамдар алдындағы жауапкершілікті сезінуге шақырады».
